Елімізде ҰБТ-тің басталғанына бір айға жуықтап қалды. Тестілеу 5 шілдеге дейін жалғасады. Жалпы Шымкентте ҰБТ тапсыруға 90 пайызға астам талапкер өтініш берді. Қаламыздың үшінші мегополисінде ол қалай өтіп жатыр. Біздің түсіруші топ түлектермен кездесіп қайтты.
Ұлттық тестілеу орталығының таратқан соңғы ақпаратына сүйенсек, тестілеу басталғаннан бергі 2 аптадан аса уақытта негізгі ҰБТ-ны 71 мыңға жуық адам тапсырды. Оның ішінде талапкерлердің 71%-ы қазақ тілінде, 29%-ы орыс тілінде, 84 адам ағылшын тілінде тестілеуден өтті. ҰБТ басталғалы шекті ұпайды 74%-ға жуық талапкер жинады. Орташа ұпай 67-ні құрады. Өткен 2 апта ішінде тапсырғандардың ең жоғары ұпайы 137 болды, оны осы аптада үш талапкер жинай алды.
Екі аптаның қорытындысында 126 ереже бұзушылық анықталды. Оның ішінде 94 талапкер смартфон, шпаргалка, басқа да тыйым салынған заттарды алып өту әрекеті салдарынан тест тапсыру мүмкіндігінен айырылды. Тестілеу кезінде ереже бұзғаны үшін аудиториядан 27 адам шығарылып, олардың нәтижелері жойылды. Бейнежазбаларды тексеруден соң, ереже бұзған тағы 5 адамның нәтижесі жойылды. Ал тестілеуге кіруге талпынған, кірген бөгде адамдар анықталған жоқ. Айта кетсек, биыл ҰБТ аяқталғаннан кейін 31 қазанға дейін тестілеудің бейнежазбаларына талдау жүргізіледі. Тыйым салынған заттарды пайдалану немесе ереже бұзу фактілері анықталған жағдайда талапкердің ҰБТ нәтижелері жойылады.
Әуелде ҰБТ қорытынды сынақ әрі жоғары оқу орнына түсу емтиханы ретінде тапсырылатын. 2017 жылдан бастап оны тек жоғары оқу орнына түсу үшін тапсыратын болды. Әрі оған қатысу не қатыспау оқушының өз еркінде. Кейін сынақ компьютерлік форматқа көшірілді. Бұл оның қоғам алдындағы ашықтығын қамтамасыз етті. Кез келген адам сілтеме арқылы кіріп, тестілеу орталықтарындағы (республика бойынша барлығы 40 орталық) науқанның қалай өтіп жатқанын бақылай алатын күнге жетті. Былтырдан бастап «бір компьютер, екі камера, бір сынақ тапсырушы» қағидасы да қолданылып келеді. Бұл қадам бейнежазбалар арқылы бұзушылықтарды анықтауға мүмкіндік береді.
