Төл тарихымыздың ақтаңдағы ретінде сақталған репрессия жылдары – көңілге қаяу салғанымен, ұмытылмайтын саяси құбылыс. Сананы соғыссыз жаулаған большевиктік жүйе – қазақтың 125 мыңнан астам азаматын қудалады. 25 мыңын жазықсыз құрбан етті. 31 мамыр – қуғын-сүргін және ашаршылық құрбандарын еске алу күні. Осыған орай қала халқы бүгін «Қасірет» мемориалына жиналды.
ХХ ғасырдың басында бірнеше ұлттың басына қара бұлт үйірілді. Сұрқай саясат бетке ұстар көшбасшылардан бастап, көзі ашық азаматтарды сарсаңға салды. Жазықсыз айыптаулар мен азапты күндердің соңы қасірет әкелді. Уақыт өткенімен, ұмытылмайтын ол кезеңге 1997 жылы күнтізбеден орын беріліп, 31 мамыр еске алу күні деп бекітілді. Атаулы күнді шаһар жұртшылығы жадынан шығармаған. Кезінде «Түлкі сай», «Азалы сай» аталған Қасірет шатқалына таңнан жиналып, «Ана мен бала» ескерткішіне гүл шоқтарын қойды.
Нәубетті кезеңді, қаза тапқандарды бір минут үнсіздікпен еске алып, төменде орналасқан кешен тақта мен «Қасірет» мемориалына барды.
Қаланың бас имамы алма-ғайып кезеңнің құрбандарына Құран бағыштап, жиналған көпшілік дұға жасады. Кешен ішіндегі қара темір тор мен қақ айырылған ақ мәрмәр тас репрессия жылдарын суреттейді.
Жиынға репрессияға ұшыраған азаматтардың ұрпағы да қатысты. Соның бірі Бақытжан Қуанышбеков. Ұлтшыл деп айып тағылып, репрессияға ұшыраған Қуанышбек Тәжібаев туралы бүгінде немересі мұрағат ақтарып, дерегін іздеп келеді. Қолда бары жалғыз портреті ғана.
Репрессияға ұшыраған 125 мыңнан астам қазақстандықтың 7 мыңы оңтүстіктің азаматтары болатын. Олардың 2,5 мыңы «халық жауы» деп атылды. Бұл күннің мән-маңызы туралы Мемлекет басшысы пікір білдіріп, жазықсыз жапа шеккендерді ақтау, тыңғылықты зерттеу жұмысына баса мән берілгенін айтты.
