Мегаполисте 30 тамыз – Конституция күніне орай «Ұлы дала шежіресі – Ата заң» мерекелік салтанатты іс шарасы өтті. Қала әкімі елдігімізді ұлықтаған бас құжаттың салтанат құрған 28 жылдығымен құттықтап, жаңа Қазақстанның жетістіктеріне, шаһардың 5 жылдағы әлеуметтік-экономикалық дамуына тоқталды.
Еліміздің Конституциясы 1995 жылы 30 тамызда бүкіл халықтық референдумда қабылданды. Айбарлы Ата Заңымыздың қабылдануы – тарихи сәт. Сол сәттен бастап асыл қазынамызға құрмет көрсетіліп, төрімізде тұр. Арнайы театрландырылған қойылымнан басталған салтанатты кеште Әнұран шырқалып, Көк Туымызға құрмет көрсетіліп, сарбаздар рухты асқақтататын патриоттық әндерді шырқады.
Қала әкімі М.Әйтенов мерекелік жиынға арнайы қатысып, қала жұртшылығы мен қонақтарын ел тарихындағы маңызды мерекемен құттықтады.
— Мемлекет басшысы Қасым-Жомарт Тоқаев елімізді саяси, құқықтық және әлеуметтік-экономикалық тұрғыда жаңғыртып, Әділетті Қазақстанды қалыптастыру мақсатында жүйелі реформаларды жүзеге асырып келеді.Бүгінде Қазақстан құқықтық-демократиялық дамудың жаңа бір кезеңін бастан өткізіп жатыр. Азаттығымыздың айшықты айғағы айналған Ата Заң — тәуелсіздіктің теңдессіз тартуы. Халықтың өзі дауыс беріп қабылдаған өзгерістер арқылы Конституциямыз өркениетті мемлекеттің барлығына тән демократиялық қағидалармен толық қамтылып отыр» — деді қала әкімі.
Сонымен бірге, салтанатты жиын кезінде Қазақстан Республикасы Конституциясының ұлықтығын қамтамасыз етуге, қаланың көркейіп, дамуы жолында елеулі үлес қосқаны үшін бірнеше азаматтар марапатталды.
Қазақстанның Құрметті судьясы Бекет Тұрғараев: Конституция — мемлекетіміздің құқықтық негізін айқындаған құжат, мызғымас мемлекетіміздің алтын қазығы. Бірлігі мен ынтымағы жарасқан елдігіміздің бұлжымас бағдары, кемел келешегіміздің кепілі екенін айтты.
Ата Заңымыз ұлықталған мерекелік іс шарада қалалық мәдениет үйі өнерпаздары, цирк әртістері мен өзге де жергілікті өнерпаздар патриоттық бағыттағы ән-жырлары мен қойылымдарын көпшілікке ұсынды.
