«БОС ЖҰМЫС ОРЫНДАРЫ» ЖӘРМЕҢКЕСІ ӨТТІ

Үшінші мегаполисте «Еңбек мобильділігі» орталығының ұйымдастыруымен Тұран аудандық «Мансап» мекемесінде кезекті «Бос жұмыс орындары» жәрмеңкесі өтті. Мұнда Шымкент қаласындағы үздік және танымал жұмыс беруші компаниялар, мемлекеттік мекеме мен ірі кәсіпорындар жиналған. Жәрмеңкеде жастарға 4 мыңнан астам бос жұмыс орындары ұсынылды. Сала мамандары жұмыс іздеушілердің мүддесін көздей отырып, шара барысында жалақы, еңбек шарттары мен қауіпсіздігі жөнінде толық мағлұматтар берді. Жәрмеңке сондай-ақ қалалық «Жастар Ресурстық» орталығы және «Жастар рухы» ұйымының қолдауымен ұйымдастырылды. Жұмыспен қамтуға бағытталған шара бірінші кезекте халықтың мүддесін көздейді. Мақсат — жұмыс берушілерді тарта отырып, жоғарғы оқу орындары мен колледж түлектерін еңбекпен қамту. Жәрмеңкеде білім беру, медициналық, техникалық, жеңіл және тоқыма өнеркәсібі мен басқа да қызмет көрсету салалары бойынша 4 мыңнан астам уақытша және тұрақты бос орындар ұсынылды. Жұмыс беруші 35 мекеме азаматтарды еңбек шарттары және жалақы көлемімен таныстырып, мансап жолын бірге бастауға шақырды. Жалпы, Шымкент қаласы бойынша биыл 57 мың адамды жәрмеңкеге қатыстыру жоспарланған. Оның ішінде қалалық «Еңбек мобильділігі» орталығы тарапынан 16 мыңнан астам халықты жұмысқа орналастыру көзделген, бірақ ұйымдастырушылардың айтуынша, шараға қызығушы халық саны аз. Атап айтқанда, «ЭКО ФАРМ» мекемесі 100-ге жуық бос орындарды ұсынған, дегенмен жұмыссыз жастардың белсенділігінің төмен болуына байланысты бос орындар өз жұмыскерлерін әлі де күтуде.