Шымкентте тірек-қимыл ауруларын емдейтін — Belmed медициналық сауықтыру орталығы жұмысын бастады. Заманауи техникамен жарақтандырылған медициналық нысан Қаратау ауданынан бой көтерген. Кезінде бел омыртқа ауруына шалдығып, талай дәрігердің есігін тоздырған орталықтың құрылтайшысы шаһар халқы үшін керек сауықтыру орнын ашуды жөн көріпті. Мекеме 40 адамды қабылдауға қауқарлы. Халықтың өмір сүру көрсеткішін арттыратын жаңа нысанның лентасын Қаратау ауданы әкімдігі мен құрылтайшысы қиды.
Ашылу салтанатына қатысқан Рахымберді Мүлкеманов аудандағы медицина саласы бойынша көрсеткішті тізбектеп, мемлекеттік-жекеменшік серіктестік аясында салынатын медициналық мекемелерге тоқталды.
Бас дәрігер Нұрсұлтан Қабатаевтың айтуынша, сауықтыру орталығы – көпсалалы. Мұнда келген тірек қимылында, мойын, бел омыртқасында ақауы бар және остеохондрозбен ауыратын науқастарға түрлі ем шаралар жүргізіледі. Яғни, жарықпен, электр тоғымен емдейді. Сондай-ақ, массаж, тұзды шахта, ер мен әйелдерге жеке бассейн бар. Сапалы, қуатты құрал-жабдықтармен қамтылған.
Орталықтың құрылтайшысы Меруерт Сансызбайқызының мамандығы есепші. Кезінде бел омыртқасының ауруына шалдығып, еліміздің түкпір-түкпірінен ем іздеген ол мегаполистен білікті дәрігерлер шоғырланған, жоғары сапада қызмет көрсететін орталық ашуға бел буған екен.
Орталықта 21 маман қызмет атқарады. Тәуліктің барлық уақытында жұмыс істейтін мекемеде бір мезгілде 40 науқас ем қабылдай алады. Бірегей нысанның қызметі — әлеуметтік саланы жаңғырту мен халықтың өміп сүру сапасын арттыруға арналады.