Түркия Республикасының Ыстамбұл қаласында “Қазақстан мәдениеті және сауда орталығы” ашылды, — деп хабарлайды aigak.kz тілшісі.
“Дүниежүзі қазақтары қауымдастығының” қолдауымен, “Әлем қазақ кәсіпкерлер қоғамдастығының” ұйымдастыруымен өткен шараға әлемнің түкпір-түкпіріндегі қандастар келді. Осыған орай “Aydin” университетінде концерттік шара ұйымдастырылды.
Шараға Дүниежүзі қазақтары қауымдастығы Төрағасының бірінші орынбасары Зауытбек Тұрысбеков, қауымдастықтың Шымкент қаласы мен Түркістан облысы бойынша филиалдарының жетекшісі Дулат Әбіш, Нұр-Сұлтан қаласынан Қарлығаш Қожамұрат, Қарағанды облысынан Меруеш Башай, Еуропа қазақтары қауымдастығының төрағасы Әбдурахман Четин және аталған оқу орнының басшылары қатысты.
Сөз алған Зауытбек Қауысбекұлы кезіндегі ұлы көш жайлы, Тибеттен асып келген қандастар жайлы айтты. Сол кезеңде атажұртқа 2 мың ғана адам көшіп келген екен. Ал, ол халықтың 1/10 ғана.
Елбасының бастамасымен тәуелсіздік жылдары қазақ жеріне 1 миллион қандас келсе, бүгінде олар 2 миллионды құрап отыр. Қауымдастық Төрағасының бірінші орынбасары қазақ ұлтының тәуелсіздігін алғаш мойындаған түріктер екеніне тоқталып, бауырлас елге алғыс білдірді. Алыс- жақын шет елден келген қандастарды 30 жылдық мерейтоймен құттықтады.
Жан-жақтан келген қонақтар сөз сөйлеп, тұсауы кесілгелі жатқан орталыққа ақжолтай тілегін жеткізді. Әртістер әннен шашу шашып, келген қонақтар ұлттық өнермен сусындап, мәз-мейрам болысты.
Әрмен қарайғы жиын Ыстамбұлдағы “Қазақстан мәдениеті және сауда орталығында” жалғасты. Дүниежүзі қазақтары қауымдастығы Төрағасының бірінші орынбасары Зауытбек Тұрысбеков, нысанның басшысы Ғанимет Қайсалұлы орталықтың лентасын қиды.
Бес қабаттан тұратын орталық екі мақсатта қызмет атқарады. Біріншісі, мәдени мақсат. Түркі елін қазақтың мәдени мұрасымен, әдет-ғұрпымен таныстыру. Көнеден жеткен тарихи деректерді қазіргі заман ағымымен тоғыстыру, байланыстыру. Екіншісі, сауда-саттық, экономикалық мақсат. Қазақтың экономикасын көтеремін деп дүниежүзілік нарыққа шығам деген қазақстандық кәсіпкерлерге бағыт беріп, жәрдемдесу мақсатында арнайы бөлмелер құрылған.
