Ә. НҰРМАХАНОВ АТЫНДАҒЫ СПОРТ МЕКТЕБІНІҢ ӨРЕНДЕРІ ЖЕҢІСПЕН ОРАЛДЫ

Түркістан облысы дене шынықтыру және спорт басқармасының «Түркістан облыстық Әбдісалан Нұрмаханов атындағы олимпиада резервінің мамандандырылған балалар-жасөспірімдер спорт мектебі» Түркістан қаласының 1500 жылдық мерейтойы қарсаңында ашылған. Мұнда негізінен Кентау қаласы мен Түркістан қаласына жақын орналасқан ауылдық елді мекен балалары жаттығады. Аталмыш спорт мектебі биылғы жылы үлкен жетістіктерге жетіп отыр, — деп хабарлайды aigak.kz тілшісі.

Яғни жуырда Күрес түрлерінен Уфада өткен 21 жасқа дейінгі жастар арасындағы әлем біріншілігіне нақ осы мектептен қатысқан үш спортшы да жүлдемен оралды. Байрақты бәсекеде еркін күрестен қыздар арасында сынға түскен Нулифар Раимова әлем чемпионы атанса тағы екі спортшы қола жүлдеге ие болып ел мерейін асқақтатты. Спорт мектебінде қазіргі таңда спорттың 18 түрі бойынша жас өрендер тұрақты түрде жаттығып келеді. Ал, білікті бапкерлер жас спортшыларды шыңдауда аянбай еңбек етуде. Атап айтсақ ауыл балалары мұнда бокс, дзюдо, таеквандо, еркін күрес грек-рим қазақ күрестері сонымен бірге самбомен айналысады. Ал мектепте барлығы 100-ге тарта жаттықтырушы жұмыс жасаса мекемеде жалпы саны 2 мыңға жуық спортшы жаттығады. Осылай деген мектеп директоры Дәурен Тәңірбергенов ендігі жерде олимпиада шыңын бағындыратын спортшы тәрбиелеп шығару басты мақсатымыз деп санайды.

Жергілікті ауыл балаларын спортқа баулып жоғары жетістіктерден көрініп келе жатқан спорт мектебінде бокс үйірмесінің де жұмысы жүйелі. Мұнда қазір жас ерекшеліктері бойынша жалпы саны 120 бала жаттықтырылады. Жастайынан былғары қолғапты жанына серік етіп білікті бапкерлерден тәлім алып жүрген боксшылардың жетістіктері де аз емес. Олардың мұнда күнделікті жаттығуларын жасап шеберліктерін шыңдауларына барлық жағдайлар қарастырылған.
Ауыл жастары арасында грек-рим күресіне де қызығушылық артып келеді. Айталық 19-22 тамыз күндері Тобыл қаласында өткен 2004-2005 жылы туылған ауыл жасөспірімдері арасындағы ҚР чемпионатында осы спорт мектебінің шәкірті Асқар Нұрдәулет жеңіс тұғырынан көрінді. Өз салмақ дәрежесінде барлық қарсыластарынан басым түсіп бірінші орынға ие болған жас өрен алдағы уақытта да байрақты бәсекелерде ел намысын қорғап жеңіске жетуді мақсат етіп отыр.