Токио Олимпиадасының қола жүлдегері Сәкен Бибосыновты түркістандық жанкүйерлері Түркістан қаласындағы халықаралық әуежайдан күтіп алды. Токио төрінде өткен додада әлемнің ең үздік боксшыларымен тайталасып, Алаштың мерейін асырған жерлесімізді облыс әкімі Өмірзақ Шөкеев, Түркістан жастары, спортшының әріптестері, туған-туыстары мен достары қарсы алды. Қазақстанның абыройын асқақтатқан боксшыға Түркістан облысының кәсіпкерлері темір тұлпар мінгізді, — деп хабарлайды Түркістан облысы әкімінің баспасөз қызметі
«Түркістан облысының тарихында алғашқы Олимпиада медалін ұтып алған Сәкен өзін үздік спортшы екенін көрсете білді. Оған барлығымыз жанкүйер болдық, куә болдық. Бұл алтынға бергісіз қола жүлде болды. Бізге үлкен мәртебе. Түркістан облысының барлық спортшыларына жеңіс тұғырынан көрінуге тілектеспіз»,- деді облыс әкімі.
Бокстан Токио Олимпиадасында 52 келі салмақ дәрежесінде сынға түскен 24 жастағы спортшы жартылай финалдық жекпе-жекте Ұлыбритания спортшысы Галал Яфаймен кездесіп, Олимпиаданың қола жүлдегері атанды.
«Мені қолдаған барша қазақ еліне, халқыма шексіз алғысымды білдіремін. Әрине негізгі мақсатымыз алтын болған. Бұйырғаны осы болды. Аллаға шүкір деймін. Қазақтың атын әлемге таныту үшін алдағы уақытта да бар күш-жігерімді салуға уәде беремін»,-деді Токио Олимпиадасының қола жүлдегері Сәкен Бибосынов.
