Түркістан облыстық мәслихатының депутаты Дулат Әбіш тұрғындармен тікелей эфирде тілдесті. Фейсбук әлеуметтік желісіндегі өз парақшасында “Депутатқа сауал қой” айдары арқылы желі қолданушыларының сұрақтарына жауап берді. Онлайн-қабылдау сипатындағы эфирде депутат «Nur Otan» партиясының «Өзгерістер жолы: Әр азаматқа лайықты өмір!» сайлауалды бағдарламасының Түркістан облысында орындалу барысы туралы ой қозғады. Эфир барысында партия тарапынан атқарылып жатқан және жоспарланған жұмыстар жөнінде, соның ішінде жастарға көрсетілетін көмектер жайындағы мәселелер қаралды. Қатысушылар өз пікірлерін білдіріп, депутатқа сұрақтарын қойды.
Мәселен, Ордабасы ауданы, Аққойлы ауылының тұрғыны Берік Әшірбердиев ауылындағы мектептің жайын қозғады. “Тозығы жеткен білім ордасы 1962 жылы салынған. 3 бөлмелі білім ұясының қабырғасы қирап, тоз-тозы шыққан. 4 жылдық “Ақбастау” бастауыш мектепте балалар екі ауысыммен оқиды. Бастауыш сыныпты аяқтаған соң, көрші Жусансай ауылына қатынап оқуға мәжбүр” — дейді. Дәл осындай мектептің мәселесі Төлеби ауданы, Ленгір қаласында да орын алып отыр. Атап айтсақ, тікелей эфирде өз сауалын жолдаған Ленгір қаласының тұрғыны №6 жалпы орта мектептің мәселесін көтерді. Аталған жайттардан хабардар Дулат Назарбекұлы тиісті мекемелерге депутаттық сауал жолдаған. Сондай-ақ Жетінші шақырылымдағы Түркістан облыстық мәслихатының кезектен тыс бесінші сессиясында қос мектептің мәселесін айтып, сала мамандарынан нақты жауап алды. Енді аталған мектептердің орнына жаңа, заман талабына сай білім ордасы салынады деп күтілуде. Тұрғындар бұл жағдайдың оң шешімін тапқанына қуанып, өз алғыстарын білдірді. Мұнан өзге инфрақұрылым, бейнебақылау камераларын орнату сынды сауалдар қойылды. Желі қолданушылары осылайша толғандырған сауалданы нақты жауап алды.
Бүгінде халық қалаулылары кестеге сәйкес, өз міндеттеріне сай өңірдегі мәселелер шешілетін сессияларға, мәжілістерге қатысып, қоғамдық қабылдаулар өткізіп жатыр. Осы арқылы депутат пен сайлаушылар арасында тығыз байланыс, диалог орнайды деген сенім бар.
