Ұлы даланың алып жыршысы

 Қазақ халық поэзиясының әйгілі тұлғасы, өлең сөздің дүлділі Жамбыл Жабаевтың 175 жылдығына орай «Ұлы даланың алып жыршысы» атты Жамбыл оқулары өткізілді. Жыр алыбының шығармалары жас оқырмандарға кеңінен насихатталып, жырларынан түйін түйген жас таланттар сайысқа түсті.

«Менің пірім Сүйінбай, сөз сөйлемен сыйынбай!» Осылайша өлең-сөздерімен өмір өткелдерін аралап, ғасырға жуық жасаған жыр алыбы Жамбыл Жабаевтың шығармасы ұрпаққа өнеге. ХХ Гомері атанған тұлғаның 175 жылдығына орай Шымкент қалалық жасөспірімдер кітапханасында мектеп оқушылары сайысқа түсті. Қатысушылар таңды таңға ұрған шебер жыршының өлеңдерінен бақ сынап, өмірі мен шығармашылығы жайында викториналық сұрақтарға жауап берді.

Болар баланың бетін қақпа, белін бу дейді дана қазақ. Аталмыш байқауға қатысушылардың арасынан 6 жасар мектеп оқушысын көзіміз шалып қалды. Әдебиетке қызығушылығы ерте жастан басталған екен. Дана Абай мен жыр жүйрігі Жамбылдың шығармаларын жатқа біледі.

Баба сөзі – болашақта бағыт беріп, жол сілтейтін темірқазық іспетті. Ұлттың мәңгілік тұлғасы – Жамбыл Жабаевтың әдебиеттегі шығармашылық мұрасы жастарға өнеге, адамзатқа аманат.

Айғақ-ақпарат