Шығармашылыққа қызығушылық танытқан жандарға жаңа мүмкіндік. «Shymkent Creative Hub» ерекше әшекей бұйымдарын жасауға арналған шеберлік сағаты өтті. «Амулет» hand-made бағытындағы сабаққа онға жуық қыз-келіншек қатысып, өз қолдарымен сәнді алқа жасады. Мұндай ашық сабақтар хабта дәстүрлі түрде ұйымдастырылып, қатысушыларға қиялын іске асырып, бірегей дүниелер жасауға жол ашады.
Қатысушылар әшекей жасаудың қыр-сырын үйреніп, өз талғамына сай ерекше алқа құрастырды. Шеберлік сағатында әр бұйымның дизайны мен ұсақ бөлшектеріне дейін мән беріліп, шығармашылыққа еркіндік берілді. Қыз-келіншектер дайын үлгіні қайталаумен шектелмей, өз идеяларын қосып, әрқайсысы өзіндік қолтаңбасы бар бұйым жасады. Ең бастысы, сабақ соңында әр қатысушы өз қолынан шыққан әшекейін өзімен бірге алып кетуге мүмкіндік алды.
Қолдан жасалған бұйымдарға деген қызығушылықтың артуы мұндай сабақтарға сұраныстың да жоғары екенін көрсетеді. Себебі мұнда дайын дүниені сатып алудан бөлек, оны өз қолыңмен жасап көруге мүмкіндік бар. Қатысушылар үшін бұл – жаңа дағдыны меңгеріп қана қоймай, бос уақытын шығармашылықпен өткізудің жақсы тәсілі.
«Shymkent Creative Hub» алаңында мұндай шығармашылық сабақтар апта сайын ұйымдастырылып тұрады. Әр кездесуде қатысушылар жаңа бағыттарды меңгеріп, өз қолдарымен түрлі бұйымдар жасауға мүмкіндік алады. Ұйымдастырушылар алдағы уақытта да шығармашылыққа қызығатын жандар үшін осындай пайдалы әрі қызықты сабақтарды өткізуді жоспарлауда.
