Шымкентте жаңа оқу жылына дайындық аясында білім беру нысандары жаңғыртылып, мектептердегі орын тапшылығын азайтуға бағытталған құрылыс жұмыстары қарқын алды
Білім беру саласының дамуы ең алдымен баланың сапалы білім алуына қолайлы жағдай жасаудан басталады. Мемлекет басшысы Қасым-Жомарт Тоқаев білім инфрақұрылымын жаңғырту, мектептердегі орын тапшылығын жою, қауіпсіз әрі заманауи оқу ортасын қалыптастыруды жүйелі түрде күн тәртібіне қойып келеді. Бұл бағыттағы жұмыстар Шымкент қаласында да кезең-кезеңімен жүзеге асуда.
Жаңа оқу жылына дайындық барысында шаһардағы 7 білім беру нысанында күрделі жөндеу жұмыстары жүргізілді. Оның ішінде 6 мектеп пен 1 мектепке дейінгі білім беру ұйымы бар. Жөндеу барысында ғимараттардың тек сыртқы келбетін жаңартуға емес, олардың қауіпсіздігі мен инженерлік инфрақұрылымын жақсартуға басымдық берілді.
Атап айтқанда, білім ошақтарындағы терезелер мен есіктер жаңасына ауыстырылып, ішкі әрлеу жұмыстары жүргізілді. Ғимараттардың сыртқы қасбеттері қапталып, шатыр, су құбыры мен кәріз жүйелері, электр желілері және жарықтандыру жүйелері жаңартылды. Сонымен бірге нысандарға автоматты өрт дабылы жүйелері орнатылып, қауіпсіздік талаптары күшейтілді.
Оқушы мен тәрбие алушының мектепте ғана емес, оның ауласында да жайлы болуы маңызды. Осыған орай білім беру ұйымдарының аумақтары абаттандырылып, жолдарға асфальт және тротуар тақталары төселді. Аулаларға бастырмалар, орындықтар мен қоқыс жәшіктері орнатылды.
Күрделі жөндеу жүргізілген нысандардың қатарында Ұлдарға арналған №1 оқу-инновациялық лицей-интернаты, Хамза атындағы №42 жалпы орта мектеп, №106 Қайнарбұлақ жалпы орта мектебі, Мұхтар Әуезов атындағы №96 жалпы орта мектеп, А.Макаренко атындағы №41 мектеп-лицей, №46 мектеп-лицей және №122 «Ақ көгершін» бөбекжай-бақшасы бар.
Бұл жұмыстар Мемлекет басшысының білім беру нысандарының материалдық-техникалық жағдайын жақсарту жөніндегі тапсырмаларымен сабақтас. Президент бұған дейін елдегі мектептердің инфрақұрылымын жаңартумен қатар, күрделі жөндеуді қажет ететін білім ошақтарын кезең-кезеңімен жаңғырту қажеттігін атап өткен болатын.
Шымкенттегі білім беру саласындағы тағы бір маңызды бағыт – мектептердегі орын тапшылығын төмендету. Қала халқының өсуі мен жаңа шағынаудандардың қалыптасуы білім беру инфрақұрылымына түсетін жүктемені арттырып отыр. Сондықтан қолданыстағы мектептерді кеңейту арқылы қосымша оқу орындарын ашу жұмыстары жүргізілуде.
Биыл қаладағы бірқатар мектепке қосымша ғимараттар салынды. Атап айтқанда, №16 Жайлау, №121 Текесу, Кенесары Қасымұлы атындағы №82, №122 Ақжар, №66 Қазығұрт жалпы орта мектептері, сондай-ақ №19 жалпы орта мектеп жанынан қосымша оқу ғимараттарының құрылысы қолға алынды. Бұдан бөлек, Сайрам көмекші мектеп-интернат-колледжіне 300 орындық жатақхана салынды.
Нәтижесінде мамыр айында Өзбекәлі Жәнібеков атындағы №19 жалпы орта мектептің 325 орындық қосымша ғимараты мен Сайрам көмекші мектеп-интернат-колледжінің 300 орындық жатақханасы пайдалануға берілді.
Жаңа оқу жылы қарсаңында №16, №82 және №121 мектептердегі қосымша ғимараттардың құрылысы да аяқталып, оқушылар игілігіне ұсынылды. Ал №66 және №122 мектептердің қосымша ғимараттарындағы құрылыс жұмыстарын жыл соңына дейін аяқтау жоспарланып отыр.
Бұл – бір ғана қаланың құрылыс көрсеткіші емес, білім беру саласындағы маңызды стратегиялық міндеттердің жергілікті жерде нақты іске асуының көрінісі. Мемлекет басшысы мектептердегі орын тапшылығын жоюды білім жүйесіндегі өзекті мәселелердің бірі ретінде атап, оқушылар үшін қолайлы жағдай жасаудың маңызын бірнеше мәрте көтерген.
Мектеп салу немесе оны күрделі жөндеуден өткізу – түпкі мақсат емес. Ең бастысы, жаңарған нысанның ішінде бала сапалы білім алып, мұғалім өз міндетін тиімді атқаратын жағдай қалыптасуы керек.
Мемлекет басшысы биылғы Тамыз конференциясында білім беру саласында инфрақұрылымдық мәселелермен қатар, педагог тапшылығын жою, ұстаздардың біліктілігін арттыру және өңірлердегі білім сапасының алшақтығын азайту міндеттеріне айрықша тоқталды.
Осы тұрғыдан алғанда, Шымкентте мектептерді жаңарту мен жаңа оқу орындарын ашу – білім сапасын арттыруға бағытталған кешенді жұмыстың бір бөлігі. Заманауи әрі қауіпсіз ғимарат, жеткілікті оқу орны, жаңарған инженерлік жүйелер мен абаттандырылған орта оқушыға сапалы білім алуға қажетті алғышарт қалыптастырады.
Бүгінде білім беру кеңістігі де заман талабына сай өзгеріп келеді. Мемлекет басшысының тапсырмасымен орта білім беру жүйесіне жасанды интеллектіні енгізу бойынша да жаңа міндеттер қойылды. 2026 жылғы 12 мамырдағы Президент Жарлығында цифрлық инфрақұрылымды дамыту, педагогтерді даярлау және оқытуды дербестендіру тетіктерін қалыптастыру қарастырылған.
Демек, бүгінгі мектеп – тек төрт қабырға мен сынып бөлмелерінің жиынтығы емес. Ол – қауіпсіздік, қолжетімділік, технология, сапалы педагогика және баланың жан-жақты дамуы тоғысатын орта.
Шымкенттегі биылғы жаңғырту жұмыстары осы талаптарға жауап беруге бағытталған. Бір жағынан, тозығы жеткен нысандар жаңарып, екінші жағынан, жаңа оқу орындары мен қосымша ғимараттар арқылы орын тапшылығы азайып келеді.
Жаңарған мектеп – жаңарған білімнің бастауы. Ал білімге жасалған инвестиция – елдің ертеңіне жасалған ең маңызды инвестиция.
