ӘСКЕРИ ТЕХНИКА «МАТЫБҰЛАҚ» ПОЛИГОНЫНА ЖЕТКІЗІЛЕДІ

Танкілер, жауынгерлік машиналар мен әскери автокөліктер Жамбыл облысындағы «Матыбұлақ» полигонына аттанды. Бұл – Қазақстан Қарулы Күштерінің «Батыл тойтарыс – 2026» стратегиялық командалық-штабтық оқу-жаттығуына дайындықтың маңызды кезеңі. Оқу-жаттығу барысында әскери бөлімдердің жауынгерлік әзірлігі тексеріліп, қазіргі заманғы жағдайларда бірлескен іс-қимылдарды орындау машығы пысықталады. 35748 әскери бөлімінің әскери қызметшілері қару-жарақ пен әскери техниканы арнайы теміржол платформаларына тиеп, оларды қауіпсіздік талаптарына сай сенімді бекітті. Жөнелтілген техниканың қатарында танкілер, жаяу әскердің жауынгерлік машиналары, көп мақсатты тартқыштар мен КамАЗ автокөліктері бар. Эшелон жолға шығар алдында әскери полиция өкілдері жеке құрамға қауіпсіздік талаптары бойынша қосымша нұсқама өткізді. Әскерлер оқу-жаттығу өтетін ауданға теміржол эшелондары мен әскери автоколонналар арқылы жеткізіледі. «Батыл тойтарыс – 2026» стратегиялық командалық-штабтық оқу-жаттығуы еліміздің бірнеше өңірінде өтеді. Оның басты мақсаты – Қарулы Күштердің қазіргі заманғы қауіп-қатерлерге қарсы әрекет ету әзірлігін бағалап, әскер түрлері арасындағы өзара іс-қимылды жетілдіру.