Жүктілік – әйел өміріндегі ең жауапты кезең. Бірақ осы уақытта мемлекет қандай медициналық көмекті тегін ұсынады? Ал МӘМС жүйесінде сақтандырылмаған аналар қайтпек? Мамандардың айтуынша, ең маңыздысы – жүктіліктің алғашқы апталарында-ақ есепке тұру. Себебі дәл осы кезеңде ана мен баланың денсаулығына төнетін қауіптердің алдын алуға мүмкіндік мол. Бұл жайында қаладағы №4 перинаталды орталықтың бас дәрігері Гүлбану Жұмағалиқызы айтып берді.
Жүкті әйел есепке тұрған сәттен бастап дәрігердің тұрақты бақылауына алынады. Қажетті зертханалық талдаулар, ультрадыбыстық зерттеулер, перинаталдық скринингтер мен мамандардың кеңесі кезең-кезеңімен жүргізіледі. Ал егер жүктілік жоғары қауіп тобында болса немесе асқыну белгілері анықталса, болашақ ана перинаталдық орталыққа жолданады.
Көпшілікті мазалайтын тағы бір мәселе – босану қызметі ақылы ма, әлде тегін бе? Мамандардың сөзінше, медициналық көрсетілімге сәйкес табиғи босану да, кесарь тілігі де мемлекет есебінен көрсетіледі. Ең бастысы – емдеуші дәрігердің бақылауында болып, белгіленген тексерулерден уақытылы өту.
