ТҰРҒЫН ҮЙ СЕРТИФИКАТЫНА ӨТІНІМ ҚАБЫЛДАУ ЖАЛҒАСАДЫ

Шымкентте мемлекеттік тұрғын үй бағдарламаларына қатысатын азаматтар үшін тұрғын үй сертификатына өтінім қабылдау басталды. Қайтарымсыз негізде берілетін бұл әлеуметтік қолдау ипотекалық несиенің бастапқы жарнасының бір бөлігін өтеуге арналған. Сертификат мөлшері ипотека сомасының 10 пайызына дейін, бірақ 1 миллион теңгеден аспайды. Бағдарлама Ұлы Отан соғысының ардагерлеріне, мүгедектігі бар азаматтарға, көпбалалы аналарға және заңда белгіленген өзге де әлеуметтік санаттарға қолжетімді. Бүгінде Шымкент қаласында тұрғын үйге мұқтаж ретінде 96 мыңнан астам азамат есепте тұр. Баспанамен қамту бағытындағы жұмыстар кезең-кезеңімен жалғасуда. Апта сайын кезекте тұрған азаматтарға пәтер кілті табысталып келеді. Ал жыл соңына дейін  7386 пәтерді пайдалануға беру жоспарланған. Жұмыс істейтін жастарды қолдау бағдарламасы да өз нәтижесін беруде. 2019-2025 жылдар аралығында 3849 жас жалдамалы баспанамен қамтылды. Қазіргі таңда жалдау мерзімі аяқталған 890 қатысушының пәтерлерін босату және оларды келесі үміткерлерге беру жұмыстары жүргізілуде. Қаладағы тұрғын үй қорында 10 мыңнан астам жалдамалы пәтер тіркелген. Сонымен қатар жалдау ақысын уақытылы төлеуді бақылау күшейтілген. Қазіргі таңда берешегі бар 209 азаматқа қатысты сот орындаушылары өндіріп алу жұмыстарын жүргізіп жатыр. Тұрғын үй сертификатын алу үшін өтініш беруші мен оның отбасы мүшелерінің соңғы алты айдағы орташа айлық табысы белгіленген талапқа сәйкес болуы қажет. Яғни, табыс ең төменгі күнкөріс деңгейінің 3,1 еселенген мөлшерінен аспауы тиіс. Биыл бұл көрсеткіш 157 мың 638 теңгені құрайды. Тұрғын үй сертификаты – баспана алуға ниетті азаматтар үшін маңызды мемлекеттік қолдау тетіктерінің бірі. Бағдарлама бастапқы жарна жүктемесін жеңілдетіп қана қоймай, әлеуметтік осал санаттағы тұрғындардың баспаналы болуына мүмкіндік береді. Сондықтан талапқа сай келетін азаматтар белгіленген мерзімде құжаттарын тапсырып, мемлекеттік қолдауды пайдалана алады.