ЖАҢА ОҚУ КОРПУСТАРЫ АШЫЛАДЫ

Биыл Шымкентте 7 білім беру нысанының жанынан қосымша ғимараттар пайдалануға беріледі. Қазіргі таңда нысандарда құрылыс жұмыстары қарқынды жүргізілуде. Сонымен қатар, тозығы жеткен 7 мектепте күрделі жөндеу басталған. Аталған нысандарды жаңа оқу жылы басталғанға дейін пайдалануға беру жоспарланып отыр.  Сонымен қатар, қалада Мемлекет басшысының тапсырмасы аясында 200 орындық ірі перинаталдық орталықтың құрылысы жалғасуда. Қазір нысанның іргетасын құю жұмыстары жүріп жатыр.

Қалада сондай ақ әлеуметтік инфрақұрылымды дамыту және ерекше күтімді қажет ететін адамдарға қолайлы орта қалыптастыру бағытындағы Мемлекет басшысының тапсырмасына сәйкес 150 орындық заманауи оңалту орталығы салынып жатыр. Қазіргі таңда құрылыстың 60 пайызы аяқталған. Жобаны 2026 жылдың желтоқсан айында аяқтап, пайдалануға беру жоспарланып отыр. Ал өткен жылы өрттен зардап шеккен Абай ауданы әкімдігінің ғимараты қайта жаңғыртылып, пайдалануға берілді. Нысан толық жөндеуден өтіп, заманауи талаптарға сай жабдықталған.

Сондай-ақ Шымкентте Қала күні қарсаңында жаңа саябақ ашылады. Шымсити шағын ауданында орналасқан, аумағы 18 гектарды құрайтын демалыс аймағының құрылысы 70 пайызға аяқталған. Жалпы шаһарда жоғарыда аталған жобалардан бөлек тағы 51 құрылыс жобасы әзірленіп жатыр. Бұл бастамалар қаланың инфрақұрылымын жақсартып, тұрғындарға қолайлы орта қалыптастыруға мүмкіндік береді.