Балаларды қорғау күні қарсаңында Шымкенттегі ерекше бүлдіршіндерге арналған мерекелік іс-шара өтті. Креатив хаб орталығында ұйымдастырылған кездесуде балаларға сыйлықтар табысталып, олардың шығармашылық жұмыстары көпшілік назарына ұсынылды.Шымкент шығармашылық индустрия қауымдастығының ұйымдастыруымен өткен шарада бүлдіршіндер мен олардың ата-аналарына мерекелік сыйлықтар табысталды. Бұл жай ғана сыйлық емес, балалардың өз қолдарымен жасаған ерекше туындылары еді.
Сыйға тартылған орамалдарға балалар өздері салған суреттерін бейнелеп, ата-аналарына деген жылы лебіздерін жазған. Балаларының шығармашылық қабілетіне куә болған ата-аналардың қуанышында шек болмады. Жалпы, ерекше бүлдіршіндерге арналған игі шаралар мұнымен тоқтап қалмайды. Балалардың шығармашылық қабілеттерін одан әрі дамыту және бос уақыттарын тиімді ұйымдастыру мақсатында ата-аналар мен орталық арасында келісім жасалды. Енді бүлдіршіндер апта сайын орталыққа келіп, сурет салу, би билеу, қолөнер бұйымдарын жасау және сән көрсетілімі секілді түрлі шығармашылық бағыттармен айналыса алады.
By Айғақ медиа
