9 мамыр – Ұлы Жеңіске 81 жыл толды. Осыған орай Шымкент қаласында Жеңіс күніне арналған салтанатты іс-шара жоғары деңгейде өтті. Бұл күн – ел тарихындағы ең маңызды әрі тағылымы терең мерекелердің бірі. Бейбіт өмір мен еркіндік жолында жанын қиған батырлардың ерлігін ұлықтап, өскелең ұрпақты отансүйгіштікке, бірлік пен ынтымаққа тәрбиелеуге бағытталған маңызды дата. Салтанатты рәсім Абай саябағы аумағында орналасқан Ұлы Отан соғысы жылдарында ерлік көрсеткен қаһармандарға арналған Даңқ мемориалы алдында өтті. Шара барысында қала әкімі Ғабит Сыздықбеков, тыл ардагерлері, қоғам өкілдері, жастар және қала тұрғындары жиналып, майданда қаза тапқан жауынгерлердің рухына тағзым етті. Қатысушылар бір минут үнсіздік жариялап, боздақтарды еске алды. Одан кейін мемориалға гүл шоқтары қойылып, Отан үшін от кешкен ерлердің ерлігіне деген шексіз құрмет көрсетілді. Жиналғандар Жеңіс күнінің тарихи мәніне тоқталып, оның тек мереке ғана емес, бейбітшіліктің бағасын ұғындыратын, өткенге тағзым ететін маңызды күн екенін атап өтті.
Шара барысында соғыс және тыл ардагерлерінің ел дамуына қосқан үлесі ерекше айтылып, олардың ерлігі мен еңбегі жас ұрпақ үшін мәңгілік өнеге екені жеткізілді. Қала тұрғындары Жеңіс күнінің ұрпақтар сабақтастығын нығайтып, ел бірлігін бекемдейтін ерекше күн екенін баса айтты. Айта кету керек, өткен жылы Шымкент қаласындағы Ұлы Отан соғысының соңғы ардагерлерінің бірі өмірден озған болатын. Осыған байланысты бүгінгі буын мен майдангерлер арасындағы тікелей байланыс үзілгенімен, олардың ерлігі халық жадында сақталып, кейінгі ұрпақ тәрбиесінде маңызды орын алуда. Бұл тағзым рәсімі – қаһарман сарбаздардың ерлігіне деген терең құрметтің айқын көрінісі болып, тарихи жадыны сақтау мен бейбіт өмірдің қадірін ұғындырудың маңызын тағы бір мәрте дәлелдеді.
