Шымкент қаласында Төтенше жағдайлар министрлігінің құтқарушылары дәрігерлермен бірлесіп, ерекше оқиғаның сәтті аяқталуына үлес қосты. Облыстық балалар клиникалық ауруханасына жеткізілген бір жарым жасар бүлдіршіннің қолы электр еттартқышқа қысылып қалған болатын.
Оқиға туралы хабарлама медицина мекемесінен 112 құтқару қызметіне түскен. Дәрігерлер алғашқы медициналық көмек көрсеткенімен, баланы өз күштерімен босата алмағандықтан, құтқарушылардың көмегіне жүгінуге мәжбүр болды.
Құтқарушылар арнайы апаттық-құтқару құралдарын пайдаланып, операцияны тікелей дәрігерлердің қатысуымен жүргізді. Баланың қауіпсіздігі үшін наркоз берілгеннен кейін, еттартқыштың темір корпусын мұқият кесу арқылы бүлдіршіннің қолы сәтті босатылды.
Бұл оқиға құтқарушылар мен дәрігерлердің кәсіби үйлесімді жұмысының нәтижесінде ешқандай ауыр зардапсыз аяқталды. Бала қазір дәрігерлердің бақылауында.
Құрметті ата-аналар! Балалардың қауіпсіздігі ең алдымен ересектердің назарында. Үйдегі тұрмыстық техникалар мен қауіпті құралдарды балалардың қолы жетпейтін жерге қою аса маңызды. Небәрі бірнеше секундтық немқұрайдылық қайғылы жағдайға әкелуі мүмкін екенін ұмытпаған жөн.
