Қазақстан Республикасы Төтенше жағдайлар министрлігінің құрылғанына 30 жыл толуына орай, Шымкент қаласының Төтенше жағдайлар департаменті «30 жыл – 30 игі іс» республикалық акциясына белсене қатысуда. Бұл бастама тек мерейтойлық шара ғана емес, халықтың қауіпсіздігіне, әлеуметтік қолдауға және экологиялық жағдайды жақсартуға бағытталған нақты қадамдардың көрінісі болып отыр.
Халық қауіпсіздігі бағытында атқарылған жұмыстар:
- 30-дан астам әлеуметтік осал отбасының үйіне газ талдағыш құралдары орнатылды. Бұл тұрмыстық газдан улану қаупін азайтып, тұрғындардың өмірін қорғауға мүмкіндік береді.
- 20-дан астам үйдің мұржасы тазартылып, иесі үшін қыс маусымындағы өрт және тұншығу қауіптері алдын алынды.
- 10 үйге балалардың терезеден құлауын болдырмау үшін арнайы қауіпсіздік бекіткіштері орнатылды.
Экологиялық қауіпсіздік те назардан тыс қалмады:
Қала тұрғындарының демалыс аймағы саналатын Қошқарата өзенінің жағалауы тазартылып, қоқыс пен тұрмыстық қалдықтар шығарылды. Бұл бастама тек табиғатты қорғау ғана емес, халықтың таза әрі қауіпсіз ортада өмір сүруіне жағдай жасаудың бір жолы болып отыр.
Әлеуметтік жауапкершілік пен қауіпсіздік мәдениеті:
«30 жыл – 30 игі іс» акциясы – ТЖМ құрылымдарының қоғамға тек төтенше жағдайда ғана көмек көрсететін орган емес, сонымен қатар жүйелі түрде профилактикалық жұмыс жүргізіп, халықтың қауіпсіздік мәдениетін қалыптастыратын құрылым екенін айқындайды.
Шымкент қаласы ТЖД бұл бастама арқылы тұрғындарға қамқорлық жасап қана қоймай, қауіпсіздік пен сенімділік құндылықтарын қоғамда орнықтыруды көздеп отыр.
