Шымкент қаласында жазасын өтеушілер арасында есірткіге қарсы түсіндіру жұмыстары жүргізілді. Бұл шара Шымкент қаласы полиция департаменті мен Қылмыстық-атқару жүйесі департаментінің (ҚАЖД) бірлескен іс-шаралар жоспарына сәйкес жүзеге асырылды.
Профилактикалық кездесулер №53 және №78 түзету мекемелерінде өтті. Оның негізгі мақсаты – сотталғандардың құқықтық сауаттылығын арттыру, есірткі заттарының зиянды әсері туралы түсінік беру, сондай-ақ қайталама қылмыстың алдын алу.
Ұйымдастырушылардың айтуынша, жазасын өтеушілердің бір бөлігі жуырда қабылданған рақымшылық туралы заңға сәйкес бостандыққа шығуға дайындалуда. Ал кейбірінің жазасы осы құжат негізінде қысқартылған. Сондықтан да мұндай түсіндіру жұмыстары олардың қоғамға қайта бейімделуіне, теріс әрекеттерге қайта бармауына ықпал етуге бағытталған.
Мекемелерде жүргізілген түсіндіру шаралары сотталғандардың құқықтық мәдениетін көтеруге, әлеуметтік жауапкершілігін арттыруға және салауатты өмір салтын ұстануға шақыруға бағытталды. Полиция департаментінің мәліметінше, осындай алдын алу жұмыстары алдағы уақытта да тұрақты түрде жалғасын табады.
