Шымкент қаласында ҚР Ұлттық кәсіпкерлер палатасы «Атамекеннің» алаңында төтенше жағдайлардың алдын алу және оқу-жаттығуларды тиімді ұйымдастыру мәселелеріне арналған дөңгелек үстел өтті.
Іс-шараға Шымкент қаласы Төтенше жағдайлар департаментінің Мемлекеттік өрт бақылау басқармасының бастығы, азаматтық қорғау подполковнигі Нұрлан Педен және Өрт сөндіру және авариялық-құтқару жұмыстарын ұйымдастыру бөлімі бастығының орынбасары, азаматтық қорғау подполковнигі Асхат Байташев төрағалық етті.
Жиынға қаладағы ірі сауда және ойын-сауық орталықтарының, базарлардың, білім беру және медициналық мекемелердің, сондай-ақ халық көп жиналатын нысандардың басшылары мен жауапты қызметкерлері қатысты.
Кездесу барысында төтенше жағдайлардың алдын алу бағытындағы өзекті мәселелер кеңінен талқыланды. Қатысушылар нысандарда өрт қауіпсіздігін қамтамасыз ету, азаматтық қорғау талаптарын сақтау, эвакуациялау жолдарын жетілдіру және оқу-жаттығулардың сапасын арттыруға қатысты нақты ұсыныстар айтты.
ТЖД өкілдері төтенше жағдайлардың алдын алудың ең тиімді тәсілі – алдын ала дайындық пен жүйелі оқыту екенін баса атап өтті. Олар әрбір мекеме басшысын өз нысандарында өртке қарсы шараларды күшейтіп, қызметкерлерін қауіпсіздік ережелеріне тұрақты оқытып-үйретуге шақырды.
Шымкент қаласы ТЖД-нің пікірінше, мұндай кездесулер төтенше жағдайлардың алдын алудағы мемлекеттік құрылымдар мен бизнес қауымдастығы арасындағы серіктестікті нығайтады. Нәтижесінде қаладағы өрт қауіпсіздігі деңгейі артып, тұрғындар мен нысандардың қауіпсіздігі қамтамасыз етіледі.
