Қазақстан Республикасы Қарулы Күштерінде жуырда Тыл мамандары күні аталып өтті. Бұл мереке – ел армиясының сенімді тірегі болып, көзге көп түсе бермейтін, бірақ аса маңызды міндетті орындап жүрген мамандардың кәсібилігі мен адалдығына құрмет білдіру күні.
Әскердің жауынгерлік қабілеті тек алдыңғы шептегі сарбаздардың дайындығымен ғана емес, сонымен қатар олардың күнделікті қажеттіліктерін толық әрі дер кезінде қамтамасыз ететін тыл қызметінің жүйелі еңбегімен тікелей байланысты. Дәл осы мамандардың арқасында әскери қызметшілер тапсырмаларын орындауға барынша жайлы әрі сенімді жағдайға ие болады.
Мереке аясында Қарулы күштерде «ҚР ҚК-нің үздік монша-кір жуу кешені» байқауы өткізілді. Бұл сайыс тыл бөлімшелерінің кәсіби деңгейін арттыруға және олардың еңбегін дәріптеуге бағытталған.
Нәтижесінде 35748 әскери бөлімі үздік үштіктің қатарынан көрініп, 3-орынға ие болды. Ерекше атап өтер жайт – бөлімшенің монша-кір жуу комбинатының меңгерушісінің міндетін уақытша атқарушы Ақмарал Тойтанова өз кәсібилігі мен жауапкершілігінің арқасында ұжымдық табысқа зор үлес қосты.
– Біздің басты мақсатымыз – сарбаздардың барлық тұрмыстық қажеттіліктерін қамтамасыз етіп, олардың тек жауынгерлік міндеттерге шоғырлануына жағдай жасау. Біз өз еңбегімізді мақтан тұтамыз және Қарулы күштердің жауынгерлік қабілетін арттыруға үлес қосып отырғанымызды зор мәртебе санаймыз, – дейді Ақмарал Тойтанова.
Әскери бөлімнің монша-кір жуу кешені заманауи жабдықтармен толық қамтылған. Бір мезгілде 500 сарбазға дейін қызмет көрсете алады. Оның құрамында үтіктеу, кір жуу, кептіру және тігін цехтары бар. Әр цехта өз ісінің майталман, тәжірибелі мамандары еңбек етуде.
Бұл – әскери қызметшілердің жеке бас гигиенасын сақтауға, киімдерінің тазалығы мен сапасына көңіл бөлуге, сонымен қатар олардың моральдық-психологиялық жай-күйін жақсартуға ықпал ететін маңызды құрылым.
Қарулы күштердің тыл мамандары – әскердің көзге көрінбейтін, бірақ берік тірегі. Олар сарбаздарды үздіксіз қамтамасыз етіп, кез келген жағдайда тапсырмаларды ойдағыдай орындауға жағдай жасайды.
Олардың адал еңбегі арқасында еліміздің Қарулы күштері мықты, ал болашағы сенімді бола түсуде.
