Шымкент қаласының Жастар сарайында әскери қызметтің өзекті мәселелерін талқылауға арналған маңызды кездесу – дөңгелек үстел өтті. Басқосуға Шымкент пен Түркістан облысында орналасқан әскери бөлімдердің командирлері, қалалық және облыстық қорғаныс істері департаменттерінің басшылары, әскери полиция бөлімінің жетекшілері, мерзімді әскери қызмет атқарып жүрген сарбаздардың ата-аналары, сондай-ақ республикалық «Сарбаз аналар комитеті – Аналар жүрегі» қоғамдық бірлестігінің өкілі Шарифа Муминова қатысты.
Іс-шара барысында мерзімді әскери қызметтің өту жағдайлары, сарбаздардың моральдық-психологиялық ахуалы, бөлімдер командованиесі мен әскерилердің отбасылары арасындағы байланыс мәселелері кеңінен сөз болды.
Шымкент гарнизонының бастығы, подполковник Сергей Бибулатов қоғамның әскерге деген сенімін нығайтудың маңыздылығына тоқталып, ата-аналардың тәрбиелік рөлін ерекше атап өтті:
– Әскери қызметшілердің отбасылары бөлімдердің өміріне белсенді араласқаны маңызды. Ата-аналардың қолдауы сарбаздарды тәрбиелеуде және әскери қызметтің беделін көтеруде шешуші рөл атқарады, – деді ол.
Кездесуде әскери басқару органдарының өкілдері әскерге шақырудың ашықтығы, сарбаздарды мүлікпен және азық-түлікпен қамтамасыз ету, олардың құқықтарын қорғау, білім алу мүмкіндіктері мен әлеуметтік кепілдіктер жайында баяндады. Әсіресе, моральдық-психологиялық қолдау мәселесі басты назарға алынды.
«Сарбаз аналар комитеті – Аналар жүрегі» ұйымының өкілі Шарифа Муминова өз сөзінде ата-аналар сенімінің маңызына тоқталды:
– Әскердегі қызмет қауіпсіз, әлеуметтік тұрғыдан қорғалған әрі беделді болуы тиіс. Жастар әскерге ықыласпен баруы қажет, ал олардың отбасылары балаларының сенімді қолда екеніне көз жеткізуі керек, – деді ол.
Дөңгелек үстел қорытындысы бойынша тараптар мерзімді әскери қызметшілердің моральдық-психологиялық жағдайын жақсартуға бағытталған жүйелі диалогты жалғастыруға және ынтымақтастықты нығайтуға уағдаласты. Бұл қадам әскер мен қоғам арасындағы сенімді арттырып, ел қорғанысын күшейтудің маңызды тетігі болмақ.
