Шымкент қаласында төтенше жағдайлар қызметі мен полиция департаменті бірлесіп кезекті профилактикалық рейд жүргізді. Басты мақсат – жарық шамы мен арнайы дыбыс сигналы қосылған өрт сөндіру және жедел-құтқару көліктерінің қозғалысына кедергі келтіретін фактілердің алдын алу.
Бұл жолы жол-патрульдік қызметінің экипажы Шымкент қаласы №9 мамандандырылған өрт сөндіру бөлімінің арнайы техникасын алып жүруді қамтамасыз етті. Полиция қызметкерлері жолдағы жағдайды қадағалап, төтенше жағдайлар министрлігінің автокөлігімен бетпе-бет келген кездегі жүргізушілердің әрекеттерін бағалады.
Тәжірибе көрсеткендей, көпшілік жүргізушілер сыпайылық пен түсіністік танытып, құтқарушылардың көлігін өткізіп жіберуге асығады. Дегенмен, тәртіп бұзғандар да кездесті: рейд барысында бір жүргізушіге әкімшілік хаттама толтырылды.
Өрт сөндірушілер мен құтқарушылар қала тұрғындары мен қонақтарына арнайы автокөлік жақындаған кезде міндетті түрде жол беруді ескертеді. Құтқару техникасына кедергі келтіру – төтенше жағдай кезінде адамның өміріне қауіп төндірумен тең. Әрбір секунд қымбат екенін ұмытпаңыз!
Шымкент қаласы ТЖД ескертеді:
- Арнайы дыбыс пен жарық шамы қосылған жедел-құтқару техникасына жол беріңіз;
- Өту жолдарын бөгемеңіз, көлігіңізді дұрыс қойыңыз;
- Құтқарушылардың жұмысына кедергі келтіру – заң бойынша жауапкершілікке тартылатынын есте сақтаңыз.
Құтқаруға кедергі жасамаңыздар – бұл біреудің өмірін сақтап қалуға мүмкіндік береді!
