Судағы қайғылы оқиғалардың алдын алу – төтенше жағдайлар қызметінің басты міндеттерінің бірі. Осы мақсатта Шымкент қаласы Төтенше жағдайлар департаменті (ТЖД) жергілікті полиция қызметімен және атқарушы органдармен бірлесіп тұрақты түрде профилактикалық рейдтер жүргізуде.
Құтқарушылардың назарында тек ресми жабдықталған жағажайлар ғана емес, сондай-ақ шомылуға арналмаған қауіпті аймақтар да бар. Солардың бірі – Бадам өзені. Бұл жерде су ағыны қатты, түбі лайлы әрі қауіпсіздік талаптарына сай жабдықталмағандықтан, шомылу өте қауіпті.
Жуырда ТЖД қызметкерлері Әл-Фараби ауданы полиция басқармасының өкілдері және Жастар ресурстық орталығы мамандарымен бірге Бадам өзені бойында кезекті рейд өткізді. Іс-шара барысында мамандар тұрғындарға суда қауіпсіздік шараларын сақтау жөнінде түсіндіру жұмыстарын жүргізді.
Атап айтқанда:
- тыйым салынған жерлерде шомылмау;
- тек арнайы белгіленген, құтқару бекеті бар қауіпсіз орындарда суға түсу;
- балаларды су жағасында қараусыз қалдырмау;
- құтқару құралдарын пайдалануды ұмытпау қажеттігі ескертілді.
Сонымен қатар тұрғындарға су айдындарын пайдалану және қауіпсіздік қағидаларын бұзғаны үшін Қазақстан Республикасының Әкімшілік құқық бұзушылық туралы кодексінің 364 және 412-баптарына сәйкес әкімшілік жауапкершілік қарастырылғаны түсіндірілді.
Мұндай шара тамыз айының 22-і күні де өз жалғасын тапты. Шымкент қаласы Еңбекші ауданы ТЖБ мамандары аудан әкімдігі, полиция, еріктілер және өрт сөндіру бөлімдерінің мобильді топтарымен бірлесіп рейд өткізді.
Тұрғындарға судағы қауіпсіздік ережелері түсіндірілді
Жадынамалар таратылды
Қауіпті аймақтарға «Шомылуға тыйым салынады» белгілері қойылды
Құтқарушылардың айтуынша, қайғылы жағдайлардың басым бөлігі қарапайым қауіпсіздік ережелерін сақтамаудан және ересектердің салғырттығынан орын алады. ТЖ қызметкерлері күн сайын өз өмірін қатерге тігіп, тұрғындардың амандығы үшін аянбай еңбек етуде.
Есте сақтаңыз: өз өміріңіз бен жақындарыңыздың қауіпсіздігі – өз қолыңызда! Құтқарушылардың ескертулеріне құлақ асып, қауіпсіздікті бірінші орынға қойыңыз.
