Қазақстан Республикасы Төтенше жағдайлар министрлігінің 30 жылдық мерейтойына орай біз ел тыныштығы мен азаматтардың өмірін қорғауда аянбай еңбек етіп жүрген нағыз батырлар туралы сөз қозғаймыз. Солардың бірі – Шымкент қаласы №5 өрт сөндіру бөлімінің қарауыл бастығы, азаматтық қорғау капитаны Арман Сарыбаев.
Арман он жылдан астам уақыт бойы өрт сөндіру және құтқару қызметінде еңбек етіп келеді. Осы жылдар ішінде ол талай қауіпті жағдайларда батылдық пен кәсіби шеберлігін танытып, талай адамның өмірін сақтап қалды. Оның ерлікке толы қызмет жолындағы ең есте қалар сәттердің бірі – 2023 жылғы 18 желтоқсанда болған «Биік» тұрғын үй кешеніндегі ірі өрт.
Өрт шыққан кезде ғимараттың оныншы қабатын қалың түтін басып, тұрғындардың өміріне қауіп төнген еді. «Адамдарды құтқару – біздің басты міндетіміз» деген қағиданы ұстанған капитан Сарыбаев жағдайды бағамдап, тұрғындарды эвакуациялауды дереу ұйымдастырды. Өзі әріптестерімен бірге қою түтінге қарамастан пәтерлерді барлап шықты. Қауіпті аймақтың бірінен мүгедек қызы бар әйелді тауып алған ол еш ойланбастан құтқаруға кірісті. Жедел әрі үйлесімді әрекетінің арқасында ана мен бала аман-есен қауіпсіз жерге шығарылды. Сол күні барлығы 2 адам құтқарылып, 50-ден астам тұрғын эвакуацияланды.
«Мұндай сәттерде ең бастысы – сабыр сақтау және командамен нақты, үйлесімді әрекет ету. Біз әрқашан біреудің өміріне қауіп төніп тұрғанын білеміз, сондықтан уақыт ұттырмай әрекет етуге міндеттіміз», – дейді Арман Сарыбаев.
Осы ерлігі мен жанқиярлығы үшін ол Қазақстан Республикасы Президентінің Жарлығымен «Ерлігі үшін» медалімен марапатталды. Бұл марапат – Арманның ғана емес, еліміздегі барлық құтқарушылардың қажырлы еңбегінің мойындалуы.
Арман Сарыбаевтың оқиғасы – төтенше жағдайлар қызметкерлерінің күнделікті қызметінің бір көрінісі ғана. Олар марапат үшін емес, жүрек қалауымен, Отан алдындағы борышын өтеу үшін өз өмірін қатерге тігеді. Осындай батырлардың арқасында халқымыздың амандығы мен тыныштығы сақталып келеді.
