Жаңа оқу жылы қарсаңында Шымкент қаласындағы ҚР Ішкі істер министрлігі Ұлттық ұланының 6506 және 6698 әскери бөлімдерінің әскери қызметшілері дәстүрлі республикалық «Мектепке жол» акциясына белсенді түрде қатысты.
Акция аясында биыл мектеп табалдырығын алғаш аттайтын әскери қызметшілердің балаларына салтанатты түрде мектеп сөмкелері мен кеңсе тауарлары табыс етілді. Барлығы 50-ге жуық бірінші сынып оқушысы жаңа оқу жылына қажетті құрал-жабдықтар жиынтығын алды. Бұл шара балалардың қуанышына қуаныш қосып қана қоймай, әскери ұжымның әлеуметтік жауапкершілігінің айқын көрінісіне айналды.
6506 әскери бөлімінің тәрбие және әлеуметтік-құқықтық жұмыстар жөніндегі орынбасары, подполковник Бауржан Шораев акцияның маңыздылығын атап өтті:
– Мектепке алғаш қадам басқан әрбір бала ерекше көңіл мен қамқорлыққа лайық. Әскери қызметшілеріміздің отбасылары үшін маңызды сәтте қолдау көрсету – біздің дәстүріміздің бір бөлігі. Бұл игі іс балаларға қуаныш сыйлап, ата-аналардың да жүгі жеңілдеуіне сеп болады, – деді ол.
Ұлттық ұланда мұндай қайырымдылық шаралары жыл сайын ұйымдастырылып, жақсы дәстүрге айналған. Басшылық тарапынан әскери қызметшілер мен олардың отбасы мүшелерін әлеуметтік тұрғыдан қолдау әрдайым басты назарда.
