22 тамыз күні Шымкент қаласында Қазақстан Республикасы Конституциясының 30 жылдығына арналған «Ата Заң – Тәуелсіздіктің тірегі» атты дөңгелек үстел өтті. Іс-шара қала прокуратурасының бастамасымен ұйымдастырылып, ұлттық іс-шаралар жоспарын жүзеге асыру аясында өтті.
Дөңгелек үстел жұмысына сот органдарының өкілдері, прокуратура мен құқық қорғау құрылымдары, үкіметтік емес ұйымдар, жастар бірлестіктері және төтенше жағдайлар қызметінің мамандары қатысты.
Жиынды қала прокурорының орынбасары Марат Ержан ашып, Конституцияның мемлекет тұрақтылығы мен адам құқықтарын қорғаудағы рөлін атап өтті. Ол заң үстемдігін қамтамасыз ету, азаматтардың құқықтары мен бостандықтарын қорғау, сондай-ақ Конституциялық Соттың нормативтік қаулыларын мүлтіксіз орындаудың маңызын ерекше атап өтті.
Талқылау барысында қылмыстық процестерде азаматтардың құқықтарын қорғау, құқықтық мемлекетті одан әрі нығайту, жас ұрпақтың елжандылық пен әділеттілік рухында тәрбиелену мәселелері кеңінен сөз болды.
Сонымен қатар төтенше жағдайлар қызметінің өкілдері азаматтардың өмірі мен қауіпсіздігін қамтамасыз етудегі өздерінің тәжірибесімен бөлісіп, табиғи және техногендік төтенше жағдайлардың алдын алу бағытында атқарылып жатқан жұмыстарды баяндады. Құтқарушылардың кәсіби дайындығы мен заңдық сауаттылығы – қоғамдағы қауіпсіздік пен тұрақтылықты қамтамасыз етудің маңызды кепілі екендігі баса айтылды.
Жиын соңында қатысушылар заң үстемдігі мен азаматтық қоғамды нығайту жолында барлық мемлекеттік құрылымдар мен қоғам өкілдері бірігіп жұмыс істеуі қажет деген тоқтамға келді. Дөңгелек үстел ортақ мақсаттарды жүзеге асырудағы бірлескен жауапкершілік пен ынтымақтастықты арттыруға шақырған мазмұнды үндеумен қорытындыланды.
