2025 жылдың шілде айында Қазақстан аумағында «Жер-2025» атты ірі ауқымды республикалық командалық-штабтық оқу-жаттығу басталды. Бұл іс-шара Қазақстан Республикасы Төтенше жағдайлар вице-министрі, генерал-майор Рамиль Камаловтың тікелей басшылығымен ұйымдастырылуда. Оқу-жаттығудың басты мақсаты – табиғи және техногендік зілзалалар кезінде әрекет ету жүйесін жетілдіру, төтенше жағдайлар кезінде жедел қызметтердің үйлесімді әрекетін қамтамасыз ету және олардың кәсіби дайындық деңгейін арттыру.
Оқу-жаттығу екі күнге жоспарланған және бірнеше кезеңнен тұрады. Оның бірінші кезеңі таңғы сағат 08:00-де басталып, азаматтық қорғау мемлекеттік жүйесінің барлық құрылымдары жоғары дайындық жағдайына келтірілді. Төтенше жағдайлар министрлігінің бөлімшелері, жедел қызметтер мен жергілікті атқарушы органдар үйлесімді жұмыс істеу тетіктерін тәжірибе жүзінде пысықтауда. Сонымен қатар, зардап шеккен тұрғындарды уақытша орналастыру үшін шатырлы қалашықтар құрылып, қажетті инфрақұрылыммен қамтамасыз етілді.
«Жер-2025» оқу-жаттығуына үш ірі әскери бөлім – №52859, 28237 және 68303, сондай-ақ Түркістан, Жамбыл және Қызылорда облыстарының Төтенше жағдайлар департаменттері белсенді қатысуда. Бұған қоса, Денсаулық сақтау және Қорғаныс министрліктерінің құрылымдары, Апаттар медицинасы орталығының мамандары жұмылдырылып, барлығы 269 қызметкер мен 90 бірлік арнайы техника тартылды.
Оқу-жаттығу барысында жер сілкінісі салдарынан болған апат жағдайын жою, зардап шеккендерге алғашқы медициналық көмек көрсету, эвакуация шараларын ұйымдастыру, инженерлік іздестіру және құтқару операциялары сынды түрлі сценарийлер қарастырылып отыр. Бұл шара азаматтық қорғау саласындағы ұлттық қауіпсіздікті нығайтуға, мамандардың шұғыл әрекет ету шеберлігін арттыруға және халықтың қауіпсіздігін қамтамасыз етуге бағытталған.
Оқу-жаттығу жиынының екінші кезеңінде жаттығу бағдарламасына сай Шымкентте магнитудасы 7,9 баллды құрайтын жер сілкінісі болып, соның салдарынан қала аумағында ірі көлемді төтенше жағдай орын алды.
Құтқару жұмыстарына еліміздің барлық өңірлерінен шамамен 25 мың адам және 5 мың арнайы техника жұмылдырылды.
Ауыр техника «КеденТрансСервис» теміржол тармағынан «Қазақстан Темір Жолы» АҚ мамандарының көмегімен түсірілді.
Құтқару топтарының қауіпсіз қозғалысын Полиция департаментінің күштері қамтамасыз етті.
Мұндай ауқымды жаттығулар еліміздегі төтенше жағдайлармен күрес жүйесінің тұрақты дамуына серпін беріп, мемлекет пен қоғам арасындағы үйлесімді байланыстың негізін нығайта түседі.
