Шымкент қаласындағы «Оңтүстік» өңірлік қолбасшылығына қарасты алтыншы механикаландырылған құраманың жауынгерлері «Дарбаза» оқу-жаттығу полигонында кезекті жауынгерлік дайындық кезеңін бастады. Бұл жолы взвод және бөлімше командирлерінің қатысуымен нұсқау-әдістемелік сабақтар өткізілуде.
Жаттығу аясында полигон аумағында теориялық және практикалық кезеңдерді қамтитын оқу орындары ұйымдастырылды. Сабақтар барысында командирлер мен сержанттар бөлімшелердің ұрыс кезіндегі іс-қимылдарын ұйымдастырудың тиімді тәсілдерін меңгерді. Әскери қызметшілер «бөлімшенің шабуыл мен қорғаныстағы әрекеттері», «қарсыласты оқшаулау» және «елді мекендегі ұрыс» тақырыптары бойынша практикалық тапсырмаларды орындады.
– Бұл сабақтардың негізгі мақсаты – командирлер мен жеке құрамды штаттық қару-жарақты қолдана отырып, ұрысты тиімді жүргізуге баулу. Отты шебер басқару мен бұйрықтарды нақты жеткізе білу – тапсырмаларды табысты орындаудың негізгі кепілі, – дейді екінші мотоатқыштар батальонының командирі майор Азамат Куатов.
Күннің екінші жартысында екінші мотоатқыштар батальонының жеке құрамы шартты түрде заңсыз қарулы құрылымдардың шабуылын тойтару бойынша жаттығу жүргізді. Жауынгерлік атыстар бөлімшенің барлық штаттық қару түрлерін қолдану арқылы жүзеге асырылды.
– Бөлімшелердің жауынгерлік үйлесімділігін арттыру мақсатында бұл сабақтар үлкен маңызға ие. Жеке құрам белгіленген тапсырмаларды жоғары дайындық деңгейінде орындады, – деді бесінші мотоатқыштар ротасының командирі аға лейтенант Бегжан Ибрагим.
Алдағы уақытта «Дарбаза» полигонында барлығы 54 бөлімшенің жауынгерлік атыстары өтеді деп жоспарлануда. Олардың 27-сі түнгі уақытта жүргізілмек. Сонымен қатар, 36 атыс екіжақты форматта ұйымдастырылмақ. Бұл – бөлімшелердің өзара әрекет ету қабілетін арттырып, шынайы ұрыс жағдайына барынша жақын ортада командирлердің тактикалық шешім қабылдау дағдыларын дамытуға септігін тигізеді.
