2024 жылдың көктемінде Шымкент қаласынан мерзімді әскери қызметке шақырылған 86 жас жігіт мемлекеттік білім беру грантын жеңіп алып, еліміздің жоғары оқу орындарына оқуға түсу мүмкіндігіне ие болды. Бұл — Қазақстан Республикасының Қорғаныс министрлігі мен Ғылым және жоғары білім министрлігі бірлесіп жүзеге асырып жатқан, әскери қызмет кезінде тәртіп пен үлгілі мінез-құлық танытқан сарбаздарды қолдауға бағытталған маңызды бастамалардың бірі.
Осы бағдарламаның жарқын үлгісі – запасқа шыққан қатардағы жауынгер Жанболат Еспен. Ол әскерге дейін Шымкент қаласындағы жергілікті әскери басқару органдарының бірінде инспектор қызметін атқарған. Жас жігіт мерзімді әскери борышын абыроймен өтеп, оң мінездеме алған соң, Ұлттық бірыңғай тестілеусіз-ақ мемлекеттік грант арқылы жоғары білім алуға болатынын естіп, бұл мүмкіндікті жіберіп алмауды мақсат етіп қойды.
Қарағанды гарнизонындағы әскери бөлімдердің бірінде қызмет еткен Жанболат әскери жарғы талаптарын мүлтіксіз орындап, жауынгерлік және мемлекеттік-құқықтық дайындық бағдарламаларын жоғары деңгейде меңгерді. Қызмет барысында бірнеше мәрте Астана қаласына іссапармен барып, бөлім басшылығы тарапынан жауапкершілігі мен тәртіптілігі үшін жоғары баға алды.
Он екі айлық әскери қызметін абыроймен аяқтап, «Көктем – 2024» шақырылымының үздік сарбаздарының бірі ретінде танылған Жанболат мемлекеттік грант иегері атанды. Бұл сүйінші жаңалықты ол ең бірінші анасы Гүлжаухар Сәрсембаеваға хабарлап, анасының ұлына деген мақтанышы мен ақ батасын алды.
Бүгінде Жанболат туған қаласы Шымкентке оралып, «МИРАС» университетіне құжаттарын тапсырып, білім жолын жалғастыруға дайындалып жүр. Сонымен қатар, ол Шымкент қаласының Абай, Әл-Фараби және Тұран аудандары бойынша біріктірілген Қорғаныс істері жөніндегі басқармасына арнайы барып, өз тәжірибесімен бөлісіп, болашақ сарбаздарға бағыт-бағдар көрсетті.
Аталған басқарма бастығының орынбасары, майор Ердәулет Темірбаев Жанболаттың жетістігіне жоғары баға беріп:
– Жанболаттың жолы – әскердің тек ерлік мектебі ғана емес, сонымен қатар жарқын болашаққа апарар сенімді баспалдақ екенін дәлелдейді. Оның табысы – Шымкент жастары үшін үлкен шабыт, – деп атап өтті.
