Еліміздің қауіпсіздігі мен тұтастығын қамтамасыз етуде аумақтық қорғаныс күштерінің орны ерекше. Қазақстан Республикасы Қарулы Күштері Бас штабының Аумақтық қорғаныс департаменті 2025 жылға арналған жауынгерлік даярлық жоспары аясында Шымкент гарнизонында маңызды әрі ауқымды оқу-әдістемелік жиын ұйымдастырды. Бұл — ел қорғанысын нығайту жолындағы нақты әрі жүйелі қадамдардың бірі.
Жиын шілде айының алғашқы аптасында 50120 әскери бөлімінің базасында өтті. Оған Қарулы Күштер Бас штабы бастығының орынбасары – Аумақтық қорғаныс департаментінің бастығы генерал-майор Асқар Жоламанов басшылық етті. Ол бұл жиынның еліміздегі аумақтық әскерлер құрылған 2017 жылдан бері өткізілген ең ірі форматтағы төртінші басқосу екенін атап өтті.
Жиынға өңірлік қолбасшылықтардың, десанттық-шабуылдау әскерлерінің, аумақтық қорғаныс басқармаларының өкілдері, әкімдердің әскери қауіпсіздік пен қорғаныс жөніндегі көмекшілері, сондай-ақ әкімдіктердің жұмылдыру, азаматтық және аумақтық қорғаныс басқармаларының мамандары қатысты. Ерекше атап өтерлігі — биыл алғаш рет жиын құрамына жергілікті атқарушы органдар да тартылып, азаматтық және әскери құрылымдар арасындағы үйлесімді әрекет арта түсті. Бұл қадам ұлттық қауіпсіздік жүйесін жетілдірудің маңызды тетігі саналады.
Оқу-әдістемелік жиын барысында қатысушылар аумақтық қорғаныс күштерін жоспарлау, өрістету және басқару бағытында теориялық және практикалық сабақтарға қатысты. Әскери міндеттілермен бірге ұйымдастырылған жаттығуларда қатысушылардың кәсіби деңгейі, теориялық білімі мен физикалық дайындығы тексерілді. Бұл — төтенше және дағдарыстық жағдайларда шұғыл әрекет етуге даярлықты жетілдіруге бағытталған нақты іс-қимыл.
Жиын шеңберінде патриотизм мен командалық рухты арттыру мақсатында спорттық жарыстар ұйымдастырылды. Волейбол, арқан тарту, пневматикалық винтовкамен ату сияқты сайыстарға бес командадан құралған 60 әскери қызметкер қатысты. Жарыс нәтижесінде:
- 🥇 1-орынды – Шымкент аумақтық қорғаныс бригадасы,
- 🥈 2-орынды – Қорғаныс істері жөніндегі Шымкент қалалық департаменті,
- 🥉 3-орынды – Әкімдердің әскери қауіпсіздік жөніндегі көмекшілері иеленді.
Жеңімпаздар оқу-жиын қорытындысында салтанатты түрде марапатталады.
Сонымен қатар жиын аясында «Аумақтық қорғаныс туралы» ҚР Заңының жобасы мен оны іске асыруға арналған кешенді жоспар да дөңгелек үстелде жан-жақты талқыланбақ. Бұл талқылаулар қорғаныс саласын заңнамалық тұрғыдан нығайтып, практикалық тиімділігін арттыруға бағытталған.
Бұл оқу-әдістемелік жиын — еліміздің қорғаныс қабілетін жетілдіру, аумақтық қорғаныс жүйесінің тиімділігін арттыру және бейбіт уақытта да әскери-азаматтық ынтымақтастықты нығайту жолындағы үлкен жетістік. Мұндай шаралар елін сүйетін әр азаматтың бойында патриоттық рухты оятып, Отан алдындағы жауапкершілік сезімін тереңдете түсетіні сөзсіз.
Аумақтық қорғаныс – бейбіт өмірдің берік қалқаны!
