Шымкент қаласында құқық қорғау органдарының бастамасымен азаматтық қару айналымын бақылауға алу және атыс қаруын қолдана отырып жасалатын қылмыстардың алдын алу мақсатында «Қару» жедел-профилактикалық іс-шарасы өткізілді. Шара шілде айының 1–10 аралығында өтті және оның аясында полиция қызметкерлері бірқатар кешенді жұмыстарды жүзеге асырды.
Бұл іс-шараның басты мақсаты – заңсыз айналымдағы қару-жарақ пен оқ-дәрілерді тәркілеу, қару иелерінің оны сақтау және алып жүру талаптарын тексеру, сондай-ақ қоғамдық қауіпсіздікті нығайту. Қоғам тыныштығын сақтауда алдыңғы шепте жүрген полицейлер тұрғын үйлерде, аңшылық алқаптар мен шалғайдағы шаруа қожалықтарында рейдтік тексерулер жүргізіп, қару иелерінің тұрғылықты жерлерін аралады.
Аталған шара барысында полиция қызметкерлері 5276 азаматтық қару иесін тексеріп, 128 әкімшілік құқық бұзушылықты анықтады. Атап айтқанда, қаруды сақтау, алып жүру және тасымалдау тәртібін бұзғаны үшін 3 азамат, тіркеу тәртібін бұзғаны үшін 20 азамат жауапкершілікке тартылды. Сонымен қатар, 9 бірлік заңсыз суық қару тәркіленіп, оларға қатысты тергеу амалдары жүргізілуде.
Полиция қызметкерлерінің айтуынша, азаматтардың заңсыз сақталған қаруды, оқ-дәрілерді және жарылғыш заттарды өз еркімен тапсыруы – тек қана өздерін жауапкершіліктен босатып қана қоймай, қоғам қауіпсіздігіне қосқан үлесі болып табылады. Қазақстан Республикасының қолданыстағы заңнамасына сәйкес, егер қару иесінің әрекетінде басқа да қылмыстық белгілер болмаса, олар қылмыстық және әкімшілік жауапкершіліктен босатылады.
Мұндай жедел-профилактикалық шаралар полиция қызметкерлерінің кәсіби шеберлігін, қоғам алдындағы жоғары жауапкершілігін көрсетеді. Қоғамдағы тұрақтылық пен қауіпсіздік – тәртіп сақшыларының тынымсыз еңбегінің нәтижесі. Сондықтан олардың мәртебесі мен беделін арттыру – қоғамның ортақ міндеті.
Полиция қызметі – бұл тек тәртіпті қадағалау ғана емес, азаматтардың бейбіт өмірін қамтамасыз ету жолындағы күнделікті қауіп-қатерге толы жауапты міндет. Қоғамдық тәртіпті сақтау, қылмыстың алдын алу және азаматтардың тыныштығын қорғау ісінде полицейлердің орны ерекше. Шымкент қаласында өткізілген «Қару» іс-шарасы осының айқын дәлелі.
