Қазақстанның жас құтқарушылары халықаралық деңгейде өздерінің батылдығы мен кәсіби машығын дәлелдеді. Шымкент қаласынан келген «Жас құтқарушылар» командасы Беларусь Республикасының Минск облысындағы «Зубренок» ұлттық балалар білім беру-сауықтыру орталығында өткен XVIII халықаралық жас өрт сөндіруші-құтқарушылар слетінде жүлделі үшінші орынға ие болды.
2025 жылғы 8–16 шілде аралығында өткен бұл беделді байқауға Әзербайжан, Беларусь, Қазақстан, Ресей және Өзбекстаннан келген үздік командалар қатысты. Қазақстан намысын қорғаған жас құтқарушылар жарыс барысында жоғары физикалық дайындықты, шеберлікті және командамен әрекет етудегі үйлесімділікті көрсетті.
Қатысушылар 8 күн бойы «Арқан қалашығы», «Өрт эстафетасы», «Судағы эстафета», «Алғашқы көмек», «International Talents 4 Safety», «Спортландия» және басқа да байқауларда бақ сынасты. Әр сайыс өмірлік маңызды дағдыларды меңгеруге бағытталып, төтенше жағдайлар кезіндегі шұғыл әрекеттерді тиімді ұйымдастыруды үйретті.
Қорытынды бойынша 1-орынды Беларусь командасы, 2-орынды Ресей Федерациясының командасы, ал 3-орынды Қазақстан командасы жеңіп алды. Бұл жеңіс – еліміздегі жастардың құтқарушылық қызметке деген қызығушылығының артып, қауіпсіздік мәдениетінің нығайып келе жатқанының айқын дәлелі.
Халықаралық слетке қатысу жасөспірімдер үшін тек жарыс қана емес, құтқару ісінің негіздерін меңгеруге, жаһандық әріптестік орнатуға және басқа елдердің мәдениетімен танысуға мүмкіндік берді. Олар баға жетпес тәжірибе жинап, болашақта кәсіби құтқарушы болуға бір қадам жақындай түсті.
Қазақстан құрамасын шын жүректен құттықтай отырып, олардың халықаралық аренада ел намысын абыроймен қорғағаны үшін алғыс білдіреміз. Жас құтқарушыларға жаңа биіктер мен жарқын жеңістер тілейміз!
