Шымкент қаласында құтқарушылар мен олардың отбасыларына қолдау көрсету, кәсіби әлеуетін арттыру және материалдық-техникалық базасын нығайту бағытында бірқатар маңызды жобалар жүзеге асты. Бұл бастамалар Қазақстан Республикасы Төтенше жағдайлар министрлігінің ведомстволық бағдарламалары аясында іске асырылып отыр. Жаңадан ашылған медициналық орталық, өрт-техникалық зертхана және тұрғын үй мен техника тапсыру рәсімі — осының жарқын дәлелі.
ҚҰТҚАРУШЫЛАРҒА АРНАЛҒАН АЛҒАШҚЫ МЕДИЦИНАЛЫҚ ОРТАЛЫҚ АШЫЛДЫ
Шымкентте алғаш рет Төтенше жағдайлар департаменті қызметкерлеріне, олардың отбасыларына және азаматтық қорғау органдарының ардагерлеріне арналған мамандандырылған медициналық орталық есігін ашты. Бұл – елімізде құтқарушылар үшін ашылған алғашқы осындай нысан. Орталықтың ашылуына ҚР Төтенше жағдайлар министрі Шыңғыс Әрінов арнайы қатысты.
Жоба ведомстволық әлеуметтік қолдау бағдарламасы аясында жүзеге асырылып, ғимарат толық күрделі жөндеуден өткізілді. Медициналық мекеме қазіргі заман талабына сай жабдықталып, ішінде терапевт, психолог сынды мамандар қызмет көрсетеді. Қызметкерлер мен олардың отбасыларына көрсетілетін медициналық көмек тегін ұсынылады. Әсіресе құтқарушылардың кәсіби қызметінің жоғары деңгейдегі стреске толы ерекшелігі ескеріліп, психологиялық қолдау басты назарға алынған.
— Осындай орталықтар еліміздің барлық өңірінде болуы тиіс. Біз осы бағытта белсенді жұмыс істеп жатырмыз. Құтқарушылардың денсаулығы — біздің басым бағытымыз, — деді министр Шыңғыс Әрінов.
Бұл орталық тек денсаулық сақтау саласында ғана емес, жалпы әлеуметтік қамсыздандырудың маңызды буыны ретінде қарастырылып отыр. Орталықтың ашылуы ведомстволық қолдаудың өзге шараларымен тығыз байланысты.
ӨРТ-ТЕХНИКАЛЫҚ ЗЕРТХАНА: ҚАУІПСІЗДІКТІ ҚАМТАМАСЫЗ ЕТУДІҢ ЖАҢА ДЕҢГЕЙІ
Қауіпсіздік саласындағы тағы бір маңызды қадам — Шымкентте заманауи өрт-техникалық зертхананың ашылуы. Бұл зертхана өңірде өрттің себептерін анықтау, түрлі материалдардың жанғыштығын талдау және өрт қаупіне баға беру бағытында мамандандырылған алғашқы мекеме болып табылады.
Жалпы аумағы 105 шаршы метрді құрайтын жаңа нысан зертханалық үй-жайдан, қызметтік кабинеттен және гараждан тұрады. Онда екі маман жұмыс істейді. Қызметтік автомобиль мен 37 бірлік заманауи зертханалық жабдық материалдардың отқа төзімділігі мен жанғыштығын анықтауға мүмкіндік береді. Барлық құрылғылар Ұлттық сараптама және сертификаттау орталығынан өткізілген.
Бұл зертхананың ашылуы тек өңірдегі ғана емес, жалпы еліміздегі өрт қауіпсіздігін зерттеудің жаңа сапалы деңгейге көтерілуіне ықпал етеді. Ол алдағы уақытта өрттердің алдын алу, сараптама жүргізу және зерттеу базасын кеңейтуге жол ашады.
ҚЫЗМЕТТІК ТҰРҒЫН ҮЙ, ТЕХНИКА МЕН НЫСАНДЫ КИІМ: ҚҰТҚАРУШЫЛАРҒА ҚОЛДАУ ЖАЛҒАСУДА
Шымкент қаласының орталық алаңында өткен салтанатты іс-шарада Төтенше жағдайлар департаменті қызметкерлеріне жаңа қызметтік пәтерлердің кілттері, нысанды киім-кешек пен заманауи құтқару техникасы табысталды. Шараға ҚР Төтенше жағдайлар министрі Шыңғыс Әрінов пен Шымкент қаласының әкімі Ғабит Сыздықбеков қатысты.
Ведомстволық бағдарламалар аясында өңірге жіберілген техникалардың көлемі рекордтық көрсеткішке жетті. Бұл қадам оңтүстік аймақтағы төтенше жағдайларға әрекет ету мүмкіндіктерін айтарлықтай арттырады.
Сонымен қатар, 25 қызметкерге «Qamqor» өңірлік тұрғын үй бағдарламасы шеңберінде жаңа пәтерлердің кілттері тапсырылды. Құтқарушылар қорының қолдауымен оларға жаңа үлгідегі нысанды киім-кешек берілді.
— Бүгінгі оқиға – бұл жай ғана автопаркті жаңарту немесе кілттерді табыстау емес. Бұл — мемлекеттің құтқарушы мамандығына деген құрметінің айқын көрінісі. Біз бұл мамандықты беделді, құрметті және ауқатты ету жолында жұмысты жалғастырамыз, — деді министр Шыңғыс Әрінов.
Жалпы, Шымкент қаласында іске қосылған бұл жобалар — азаматтық қорғау саласын жүйелі түрде жаңғыртуға бағытталған ауқымды бағдарламаның нақты көрінісі.
Құтқарушылардың кәсіби және әлеуметтік жағдайын жақсарту, олардың денсаулығы мен тұрмысына қамқорлық көрсету — еліміздің қауіпсіздігіне қосылатын сенімді үлес. Бұл шаралар қоғамның бірінші кезекте көмекке келетін жандарға деген сенімі мен құрметін арттыруға бағытталған маңызды әрі өзекті қадамдар.
