Шымкент қаласында жаз мезгілінде жиілейтін балалардың көпқабатты үйлердің терезелерінен құлау деректерінің алдын алу мақсатында кешенді профилактикалық шаралар күшейтілуде. Бұл туралы бүгін Шымкент қаласының Өңірлік коммуникациялар қызметінде өткен брифингте Шымкент қаласы Төтенше жағдайлар департаментінің Төтенше жағдайлардың алдын алу басқармасының бастығы, азаматтық қорғау полковнигі Ирисмат Бахтиярович Махмудов мәлімдеді.
2025 жылдың басынан бері қалада үш бірдей қайғылы жағдай тіркеліп, оның екеуі балалардың қаза болуымен аяқталса, бір бала ауыр жарақат алған. Ал 2024 жылдың осы кезеңімен салыстырғанда оқиға саны азайғанымен, салдарының ауырлығы артып отыр: өткен жылы дәл осы мерзімде 4 оқиға тіркеліп, 3 бала жарақат алып, 1 бала көз жұмған. Жыл соңына дейін жалпы 8 оқиға орын алып, соның ішінде бір өлім және жеті жарақат фактісі анықталған.
Мамандардың айтуынша, 7 жасқа дейінгі балалар терезе қауіпін бағамдай алмайды. Ал москит торлары ата-аналарға жалған қауіпсіздік сезімін тудырып, баланың салмағына төтеп бере алмайды. Жазатайым оқиғалардың басты себебі – ата-аналардың немесе ересек туыстардың баланы қараусыз қалдыруы, оның ішінде үлкен балаларға немесе қарттарға тапсыру жағдайларында бақылаудың әлсіздігі.
Тұрғындардың қауіпсіздік туралы хабардарлығын арттыру мақсатында, жергілікті және республикалық телеарналар арқылы 4 рет тікелей эфирде түсіндіру жұмыстары жүргізіліп, 22 радиоэфир ұйымдастырылды. Сонымен қатар, балалардың терезеден құлауына жол бермеу тақырыбында арнайы бейнеролик әзірленіп жатыр.
Жыл басынан бері 159 үйді аралау арқылы 2650-ден астам тұрғын қамтылып, 22 түсіндіру жиыны өткізілді. Аталған шаралар барысында 1060-тан астам жадынама таратылып, қауіпсіздік туралы нақты ұсыныстар берілді.
Әлеуметтік желілерде (WhatsApp, Instagram, Telegram) ата-аналар мен үй тұрғындарының чаттарында да белсенді түсіндіру жұмыстары жүргізілуде. Учаскелік полиция қызметкерлерімен бірлесіп, чаттарға арнайы әзірленген «5 қадам» жадынамасы тұрақты түрде жолданып отыр.
Жергілікті атқарушы органдармен бірлескен жұмыс нәтижесінде, жыл басынан бері 62 үйдің терезесіне 103 қауіпсіздік блокаторы орнатылды. Бұл бастама балалардың биіктіктен құлау қаупін барынша азайтуға бағытталған.
2025 жылдың 26 маусымында Шымкент қаласында балалардың терезеден құлауына жол бермеу мәселесіне арналған төтенше жағдайлардың алдын алу және жою жөніндегі комиссияның кезектен тыс отырысы өтті. Онда проблемалық мәселелер қаралып, нақты тапсырмалар берілді.
ҚР заңнамасына сәйкес, бала қауіпсіздігі үшін ата-аналар тікелей жауап береді. ҚР Әкімшілік құқық бұзушылық туралы кодексінің 127-бабында ата-аналық міндеттерді орындамағаны үшін әкімшілік жаза қарастырылса, ҚР Қылмыстық кодексінің 119 және 141-баптарында бала өмірі мен денсаулығына қауіп төндіретін жағдайларда қылмыстық жауапкершілік көзделген.
Шымкент қаласының Төтенше жағдайлар департаменті барлық ата-аналар мен қамқоршыларға балаларды қараусыз қалдырмауға, терезелерге арнайы бекіткіштер орнатуға және қауіпсіздік шараларын бұлжытпай орындауға шақырады.
