Шалғайдағы шағын аудандардың Қайнарбұлақ тұрғын алабы табиғи газға қосылды. Бүгіннен бастап абоненттеу жұмыстары басталған елді мекенде бас-аяғы 1500 үйге көгілдір отын құбыры тартылған. Жалпы Абай ауданы бойынша бүгінде 70 пайыз көгілдір отынмен қамтылған. Биылғы басталған жұмыстардың нәтижесінде, 2025 жылға дейін аудан халқын толықтай табиғи газбен қамту жоспарланған.
Қала әкімі Ғабит Сыздықбеков 60 мыңнан астам халқы бар Қайнарбұлақ тұрғын алабын газдандыруға бастау берді. Тұрғындар осыған дейін сұйытылған газды күнделікті қолданып келген.
Газ құбырының құрылысы 2022 жылы басталған. Қала әкімі халықты сапалы қызметпен қамтуда жауапты тұлғаларға газ құбырын ерте кезеңде пайдалануға беруді жеделдетуді тапсырды.
Айта кетейік бүгінде абоненттердің 60% — көгілдір газға қол жеткізді, ал 40% — ы биыл қараша айының соңына дейін қосылады. Тұрғындар қазірден қосылуға өтініш бере алады.
Сонымен қатар, осы жылдың соңына дейін Ынтымақ-2, Тассай, Бозарық және Көктөбе шағын аудандарының тұрғындарын көгілдір отынмен қамтамасыз ету жоспарлануда.
