Орталық Азия Инновациялық университетінің конференция залында Қазақстандық стандарттау және метрология институты Шымкент қаласының өндірістік компанияларының қатысуымен кездесу өтті. Жиында «Сертификаттау мәселелері», «Өнімді Қазақстан нарығына жіберу» тақырыптарына түсіндірме жұмыстары талқыланды. Сондай-ақ, өнімге қойылатын талаптар, оны сертификаттау, қауіпсіздік пен стандарттардың маңызы, өндірісті метрологиялық қамтамасыз ету мәселелері де назардан тыс қалмады.
Жыл сайын 14 қазанда әлемдік қауымдастық Дүниежүзілік стандарттар күнін атап өтеді. 2015 жылы Біріккен Ұлттар Ұйымы 15 жылдық батыл жоспар жасап, адамдардың өмірін жақсартуға, экологияны қорғауға және тұрақты ынтымақтастық үшін серіктестікті нығайтуға бағытталған 17 тұрақты даму мақсатын айқындады. Бұл жоспарды 170-тен астам ел қолдады, оның ішінде Қазақстан да бар.
Қазстандарттың өңірлік директоры Сәкен Бейсеев бұндай жиындарға жастарды көбірек қатыстыру керек екенін тілге тиек етті. Оның сөзінше, бүгінде бұл салаға мамандар да тапшы. Ал, «стандарттау және сертификаттау» мамандығы ең сұранысқа ие және табысы мол жұмыс екенін айтады.
Бүгінгі таңда Қазақстан осы мақсаттарға қол жеткізу бойынша ұлттық стандарттау жүйесі аясында белсенді жұмыс жүргізуде. Тұрақты даму мақсаттарын іске асыру үшін 27 060 ISO халықаралық стандарты қолданылып, оның 3 375-і ҚР стандарты және мемлекет аралық стандарттарына бейімделген.
Айта кетейік, жиын барысында стандарттау және сертификаттау саласында ұзақ жылдардан бері еңбек етіп жүрген, табысты кәсіпкерлер мен білікті оқытушыларға алғыс хат табысталды. Сонымен қатар, дөңгелек үстелге қатысушыларға техникалық реттеу, стандарттау және метрология салалары бойынша, туындаған сұрақтарға Қазақстандық стандарттау және метрология институтына жүгіну ұсынылды.
