Қала әкімі көшпелі кездесудің екінші күні Әл-Фараби ауданына барды. Географиялық орналасуы бойынша шаһардың ішкі аумағындағы аудан халқының басым бөлігін — абаттандыру, көгалдандыру, ирригациялық жүйелердің жайы алаңдатады екен. Сондай-ақ, қай заманда болмасын өзектілігін жоймаған жер дауы айтылды. Ал, балабақшада берілетін тамақтың сапасына сын айтқан ата-аналар салалық басқарма жұмысын ширатса екен дейді.
Балабақшадағы келеңсіз оқиғалар айғай-шу болып, тексеріс жүрсе ғана шешіледі. Ал, қалған күндері баяғы жартас сол жартас деген ата-аналар білім басқармасы басшысының орынбасарын тыңдағысы да келмеді.
Кездесуде мектепке дейінгі білім беру ұйымдары бойынша тағы бір мәселе айтылды. Президенттің бастамасымен атаулы әлеуметтік көмек алатын отбасының балалары балабақшаға тегін барады. Бірақ, бұл Қаулы мегаполисте әлі күшіне ене қоймаған сыңайлы.
Бұл тақырыптың төңірегінде талай ақжағалының есігін қағып, бірнеше айдан бері әуре-сарсаңға түскен ата-аналарды қала әкімі сабырға шақырды. Осы салаға жауапты орынбасары Сәрсен Абайұлына бұл мәселені шешу бойыншп тапсырма беретінін айтты.
Күншығыстық азамат өз атына тіркелген заңды жерінің мәселесін айтып, әкімнен араша сұрады. Құзырлы органдардың жұмысына қатысты өз шындығын айтқан тұрғын“қолымда дәйекті деректер бар” дейді.
Бұдан кейінгі кездесу 16-шы шағын ауданда өтті. Үй басқарушысы Раушан Жұмабекқызы көпқабатты үйдің айналасында түнгі жарықшамдар жоқ дейді. Жауапты басқарма тарапынан шешіледі деген сөзді естігенімізге көп уақыт болды деген тұрғынға әкім жалпы мегаполистегі жарықтандыру деңгейінің төмендігін айтты. Мәселен, 2023 жылға дейін 21% ғана болған екен.
Ал, Сара Қожагелдиева жас балалардың көше кезіп, қайырымдылыққа қаржы сұрап жүргеніне алаңдайды. Сабақ уақытында, одан тыс кездерде қоғамдық көлікті жағалап жүрген жастардың келешегі не болмақ, ол қалай білім алып жатыр деп қоғамдық мәселені көтерді.
Айтылған өтініш-тілектер, қозғалған мәселелер хаттамаға енді. Ғабит Сыздықбеков әрбірінің назарға алынып, заң аясында оңтайлы шешілу жолдары қарастырылатынын айтты.
