Үшінші мегаполистегі кітапханалар заман талабына сай жаңартудан өткізіліп, қала тұрғындарына қызмет көрсетуде. Әрқайсысының өз оқырманы бар. Осындай кітапханалардың бірі А.Пушкин атындағы кітапхананың іргесінің қаланғанына биыл 125 жыл толып отыр. Ғасырдан астам тарихы бар руханият ордасы қаншама буынның қадірлі ордасына айналды.
А.С.Пушкин атындағы кітапхана 1899 жылы орыс халқының ұлы ақынының 100 жылдық мерейтойына орай ашылған. Ол шақ Шымкент қаласының жаңа тарихи кезеңі басталған уақыт болатын. Қала тұрғындарының өздері қаржы жинап, қоғамдық кеңес үйінің ғимаратын салады. Ол жерде басында би кештері, әуесқой театр әртістерінің қойылымдары көрсетіліпті. Осы ғимарат ішінен 1899 жылы, А.С.Пушкиннің 100 жылдығы қарсаңында, ақын атындағы ең алғашқы кітапхана ашылды. Сонымен қатар қала тұрғындары өздері жазылған мерзімдік басылымдарды, басқа да оқу құралдарын жыл соңында кітапхана игілігіне беріп отырған. Ал 1910 жылдан бастап мерзімді басылымдар қоры құрылып, 30-ға жуық газет-журналды жаздырып алу мүмкіндігіне ие болды. Кітапхананың алтын қоры осылай қалыптасқан.
А.С.Пушкин атындағы облыстық әмбебап ғылыми кітапхана 2018 жылдың қазан айынан бастап Түркістан облысының бас әдістемелік орталығы атанды. Бүгінде тарихы ғасырдан асқан оқырман ордасы кітапханалардың беделін көтеру, заманауи бастамалардың жаршысы болуды мақсат тұтқан. Кітапханашы оқырманға тек кітап беріп отыратын, елеусіз мамандық иесі деген қасаң қағиданы жоққа шығарып, кітапханашылар қатарын жастармен толықтыру да басты назарда тұр.
«Кітап – адамды, кітапхана адамзатты тәрбиелейді» деген екен кемеңгер қаламгер Әбіш Кекілбаев. Сол тәрбие ошағының өңіріміздегі қарашаңырағы саналатын Пушкин атындағы кітапхана миллиондардың мекені саналады. 2022 жылы жаңартудан өткен А.Пушкин атындағы қалалық әмбебап кітапхананың ерекшелігі студенттер мен мектеп оқушыларының ағылшын тілін үйретудегі білім деңгейін көтеру үшін «American Corner Shymkent» атты америкалық бұрыш жұмыс істеп тұр.
