Қаланың қазіргі бюджеті 722 млрд теңге. Өткен жылғы шығыстың басым бөлігі, дәлірек 40 пайызы білім саласына бөлінген. Нәтижесінде шаһарда үш ауысымды мектептердің мәселесі түгелдей шешіліп отыр. Ал, игерілмеген қаражат саны 456 миллион теңге. Қазынадан қаралған миллиондарды іске асыра алмаған қай салалар? Қоғамдық кеңес отырысында қаржы басқармасының басшысы айтып берді. Жиында мұнан өзге қаланың жолы, баспана мәселесі де сөз болды.
Шымкент – мегаполис мәртебесін алған 2018 жылдан бері бюджетін 146 млрд теңгеден 722 млрд-қа жеткізіп отыр. Соның арқасында әлеуметтік-экономикалық дамуы алға жылжыған. Мәселен, ауыз сумен 99, кәрізбен 65, газбен 96, электрмен 100 пайыз қамтылды. Әр істің соңғы нүктесі қаражатқа тәуелді болғандықтан, қаланың бюджетін тиімді қолдануды әкімдік, мәслихат пен қоғамдық кеңес мүшелері ұдайы назарға алып отырады. 2023 жылға қаралған қаржы қалай игерілді? Нәтижесі бойынша Шымкент қаласы қаржы басқармасының басшысы Руслан Бақтыбаев қоғамдық кеңестің отырысында айтып берді.
Қаражатты толық игере алмай, қазынаға қайтарған басқармалардың көшін қалалық жайлы ортаны дамыту басқармасы бастап тұр. Каналдарды күрделі жөндеу бойынша атқарылған жұмыс сапасыз болғандықтан акт қабылданбай, 179 млн теңге қайтарылған.
Бюджет бөлінісіне қарай миллиардтардың есебін берген Бақтыбаевқа кеңес мүшелері сұрақ қойып, қаражаты қаралғанымен, жұмысы көлеңкеде қалған мәселелерді ортаға салды.
Күн тәртібіндегі екінші мәселе — тұрғындарды сапалы қоғамдық көлік қызметімен қамту, жол құрылысы бойынша жолаушылар көлігі және автомобиль жолдары басқармасының басшысы Ролан Ибрагимов баяндама жасады. Айтуынша, жол ақысын төлеудің электрондық жүйесі жаңартылмақ. Сондай-ақ, 14 түрлі санат өкіліне жол жүру ақысы тегін болады.
Қоғамдық кеңес мүшелері қаладағы қазіргі кептеліс, жол жөндеу жұмыстарының барысы туралы сұрақ қойып, ұсыныс айтты. Басқосуда үшінші болып тұрғын үй басқармасының есебі тыңдалды. Биыл 51 112 азамат тұрғын үй алу тізіміне тіркелген. Оның 13 982-сі көпбалалы отбасылар, 1915-і жетім және ата-анасының қамқорлығынсыз қалған балалар. Халықтың әлеуметтік әлсіз тобынан 17 702 азамат болса, мемлекеттік қызметшілер, бюджеттік ұйым және әскери қызметшілерден 17 381 тұрғын өтінім берген. Ал, жұмыс істейтін жастарға сатып алу құқығынсыз 900 жалдамалы пәтер беріледі. Күн тәртібіндегі 3 мәселе жан-жақты қаралып, тиісті ұсыныстар хаттамаға енгізілетін болды.
