Дүбірлі доданың жалғасы “ Күміс домбыра” иегерін анықтады. Жеңіс Шымкенттік айтыскер Аян Ниязбековқа бұйырды. Бабалар аманатын арқалаған жас таланттар тәуелсіздікті жырларына арқау етті. Сайыстың қызығы мен шыжығын тілші тарқатсын.
Шараға республикамыздың әрбір өңірінен келген жас ақындар бақ сынады. Дүбірлі доданың бірінші кезеңінде 16 ақын бір-бірімен жұптасып 8 жұп 20-25 минут көлемінде айтысты. Қазылар алқасының шешімімен финалдық кезеңге 6 ақын жолдама алды. Ал финалдық кезеңде жалпы 3 жұп 15 минут көлемінде тартысқа толы айтыс көрсетті. Қазақтың киелі өнеріне жан бітіріп, дәстүрлі түрде ұйымдастырылып тұруына басты себепкер болған Біржан Байтулов бастаған Қартау өнер мектебінің ұжымы. Бүгінде сан баланың талантын ашып, танылтып отырған өнер ордасының ұстаздары да бұл игі шараның Оңтүстік өңірінің өнеріне үлес қосатын тұсына тоқталып. Аламан доданың жастарға берер тәлімі мен тағылымын тізбектеді.
Шара Республика күніне орай ұйымдастырылып отыр. Тәуелсіздігіміздің жеткен жетістіктерін насихаттау, жас ақындардың ішкі мүмкіндіктерін ашып, әдеби үрдісте дарынды жас ақындардың жарқырап көрінуіне жол ашу. Айтыстың жеңімпаздары мен жүлдегерлерін Шымкент қаласы әкімінің бірінші орынбасары Қуаныш Асылов марапаттап, ұлттық өнерімізді ұлықтап, тамаша айтыс көрсеткен өнерпаздарға алғысын білдірді.
Сонымен, әділқазылар алқасының шешімімен жүлделі ІІІ орынды Ердаулет Ыбырай мен Нұрдаулет Өмірбекке, ІІ орын Жамбыл облысының өкілі Мұхтар Қонарбай мен түркістандық ақын Ахметрасул Баянбайға, ал, І орын Баянауылдан келген Мәрес Байронға берілді. «Күміс домбыра» айтысының бас жүлдесін Шымкент қаласының өкілі Аян Ниязбек жеңіп алды.
Осы тұста кәсіпкер Батырбек Көшербай өз есебінен домбыраның сыртын күміспен қаптатып берген. Одан бөлек, марапаттау рәсімінде арнайы өз қаржысынан қатысушы екі айтыскерге ақшалай сыйлық ұсынды. Осындай ел ағаларының арқасында жас дарындардың талантын бағалап, шарықтатуға әсте болар еді. Жарыс жеңімпаздарын құттықтаймыз.
