Орталық Азия елдерінің Кәсіподақ мүшелері IV кеңес отырысында бас қосты. Еңбек адамының құқығы мен мүддесін қорғауды басты мақсат еткен ұйым – 15 миллионнан аса жұмыскердің құқығын қорғауға ықпал етіп келеді. Семинарда еңбек миграциясы, жастар кеңесінің құрамын бекіту, Орталық Азия елдеріндегі халықаралық және ішкі туризмді дамыту секілді бірнеше тақырып аясында баяндама жасалып, пікір алмасты.
Қазақстан Республикасы Кәсіподақтар федерациясы Халықаралық еңбек ұйымымен бірлесе ұйымдастырған Орталық Азия елдері кәсіподақтарының семинарына Қырғызстан, Өзбекстан, Тәжікстан, Моңғолияның ұлттық кәсіптік орталықтарының мүшелері қатысты. Басқосуда аталған елдердегі әлеуметтік-еңбек саласындағы жағдайлар туралы мамандар баяндама жасап, өз тәжірибесімен бөлісті.
Қырғыз елінен келген Талас облыстық кәсіподақтар кеңесінің төрағасы Орталық Азия елдері шеңберінде жаңаша бағытта жұмыс істеп жатқан кәсіподақтардың өзара іс-қимылын дамыту керек дейді. Федерация өкілі өз кезегінде Қырғыз Республикасындағы еңбек адамдарының құқығы қалай қорғалатыны жөнінде пікір алмасты.
Семинарды өткізудегі мақсат – еңбеккерлердің кәсіптік, әлеуметтік, заңдық, экономикалық құқықтарын қорғап, мүддесін таптатпау үшін Орталық Азия елдерінің кәсіподақтарымен бірлесе әрекет ету. Осы ретте айта өтсек, кәсіподақ мүшелерін біріктіруде еліміздегі ең ірі қоғамдық ұйым саналатын ҚР Кәсіподақтар Федарациясы құрамына 23 салалық кәсіподақ пен 17 аумақтық бірлестікті топтастырып, 2 миллионға жуық еңбек адамын жинаған. Мемлекет басшысының, «кәсіподақтар – бұл құқықтарды қорғау, лайықты өмір мен адам еңбегі ұшін қажетті жағдаймен қамтамасыз ету бойынша прогрессивті миссияны орындайтын қазіргі таңдағы әлемнің ең маңызды қоғамдық институтының бірі» деген сөзі аталған ұйымның мән-маңызын айшықтайды.
