Шырайлы Шымкент қаласы Шығыс әуендерінің құшағында тербелді. Тәжікстанның мәдениет күндеріне арналған іс-шара Түркістан сарайында жалғасын тапты. Жексенбілік өнер кешіне Тәжікстан Республикасының мәдениет министрі Зульфия Давлатзодамен бірге арнайы келген бір топ делегация өкілдері қатысты. Мерекелік кеште екі елдің ежелгі достығы мен бауырмалдығы құрметіне Шымкент қаласы әкімі Мұрат Әйтеновтің ықылас гүлі табыс етілді. Тәжік ұлттық киімімен мың бұрала би билеп, шығыс әуендерін әуелеткен концертте Тәжікстан Республикасының мәдениет және өнер жұлдыздары ән шырқады. Тәжіктің ұлттық аспаптары сырнай, дутар, танбур, рубаб пен дойраның сүйемелдеуімен дәстүрлі әндері орындалды. Сондай-ақ, қазақ халқының алтын қорынан «Әгугай» әніне тәжік қыздары би билеп, эстрада жұлдызы Бейбіт Қорғанның репертуранындағы «Шоқ қыздар» әнін өнер жұлдыздары жандыра, әрі қосыла орындап, сахна төрін шаттыққа көмкерді. Өнерімен сахнаны жылуға бөлеген тәжік халқы, шымқала тұрғындарына жылы лебіздерін жеткізді.
Шымкент қаласының тұрғындары мен қонақтары сонау Рудаки мен Фердаусиден басталып, кешегі Садриддин Айниге дейін үздіксіз жалғасып жатқан мың жылдық бай әдебиет пен мәдениеттен сусындап, ізгілігі қайталанбас руханият пен көркемдігі тамсандырар саф өнер туындыларынан ләззат алды. Сонымен қатар тәжікстандық өнерпаздар концертте классикалық музыка туындылары мен заманауи эстрадалық әндерді де тамылжыта шырқады. Қазақстанға бірнеше мәрте іс-сапармен келген Ватанмир Карими халықтың мәдениеті мен биік мұнаралы қаламыздың сәулетіне ерекше тамсанды.
Осылай өнер қайраткерлері әзірлеген мерекелік салтанатты кеш Шымкент жұртшылығына керемет әсерлі көңіл-күй сыйлады. Сонымен қатар, Түркістан сарайы фойесінде тәжік халқының шығармашылығы, ұлттық киімдері, тарихи фото туындылары көрмеге қойылды. Концерттің соңында өнерпаздарға Шымкент қаласы әкімдігінің ықылас гүлі тапсырылды.
