Мемлекет басшысының тапсырмасына сай жастарды қолдауға бағытталған жұмыстар республиканың барлық аймақтарында басталып та кетті. Кәсібін бастаймын деген жастарға арналған игі істер мегополистерде де жүзеге асуда. Жастарға арналған жеңілдетілген несие. Жалпы, Шымкент қаласында бүгінде 132 азаматқа қолдау көрсетілген, жыл соңына дейін бұл есепті 250 азаматпен толықтыру көзделіп отыр. Жеңілдетілген несие кәсібін енді бастап отырған немесе кәсібін әрі қарай дамытқысы келген өскелең ұрпаққа зор көмегін тигізуде. Бұл жобаның негізгі шарттары несие соммасы 5 миллион теңгеге дейін, жылдық сыйақы мөлшерлемесі 2,5 пайыз. Несие мерзімі бизнес түрлеріне қарай мал шаруашылығына 7 жылды құраса, басқа бизнес жобаларына 5 жылға дейін беріледі. Ұйымдастырушылардың айтуынша келіп түскен бизнес жобалары ауыз толтырып айтарлықтай көп, кәсіпкерлер мал шаруашылығына басымдық беріп отыр. Несие алушыға қойылатын негізгі талаптар өтінім берген кезде алушының жасы 21 жастан 35 жасқа дейін болуы шарт, кәсіпкердің жеке басында мемлекеттік несие болмауы керек. Күн сайын комиссия мүшелері 40-қа жуық кәсіпкерді қабылдап отыр. Ет, сүт, ауыл шаруашылығын дамыту жоспарларынан бөлек ұйымдастырушылар жастардан жаңа серпіліс күтуде. Мәселен, жас кәсіпкер Арқас Күзембай 2-3 жылдан бері жиһаз өндірумен айналысады, өзінде ағаш станогы болмағандықтан, кәсібін өрге дөңгелету мақсатында шағын несиеге жүгінген. Кәсібіне қолдау көрсетілсе қол астындағы жұмысшылар санын арттырып, жиһаз цехын кеңейтуді көздеп отыр. Мемлекеттік қолдау жас кәсіпкерлердің кәсібін дөңгелетуіне зор мүмкіндік. Өтінімді «Аграрлық несие корпорациясы» Шымкент қаласындағы филиалына тапсыру қажет.
By Айғақ медиа
