САҚ БОЛСАҢ, САУ БОЛАСЫҢ!

Шымкент қалалық Төтенше жағдайлар департаменті қала аумағында ауа температурасының көтерілуіне байланысты ескерту жариялады.
Өрт бақылау басқармасының айтуына сүйенсек 2023 жылдың 6 айында 83 өрт тіркелген. Бұл алдыңғы жылдық көрсеткішпен салыстырғанда 1% өскен. Соның салдарынан қала тұрғындарына аптап ыстық жайлағанда өз іс-әрекеттеріне ұқыптылық танытып, демалыс орындарында өрт қауіпсіздік шараларын сақтау керек екенін ескертеді. Ыстық ауа кезінде көзге ілінбестей болған шырпыны да елеусіз қалдырмау қажет. Шыжыған ыстықта еленбеген кішкене оттың өзі қызыл жалынға алып бару қаупі зор.
Күннің ысуына байланысты суға шомылу маусымында өзендер мен көлдерде, су айдындарында демалушылардың қарасы қалың. 2023 жылы республика бойынша 105 адамның суға бату оқиғасы орын алған, оның ішінде 27-сі жасөспірімдер. Қалада суда жаппай демалу, туризм және спорт үшін арнай 5 ресми орын бекітіліп, 3 орында шомылуға рұқсат етілген. Қаланың су айдындарында азаматтардың қауіпсіздігін қамтамасыз ету мақсатында 13 орында шомылуға тыйым салып, 95 тақтайша орнатқан. Биылдан бастап департамент аудан әкімдерімен бірлесіп тұрмыстық жағдайы төмен жанұялардың балаларын суға шомылу орындарында жүзуді тегін үйрету жоспарланып отыр.