ҚАЛА КЕЛБЕТІ ЖАҢА НЫСАНДАРМЕН ТОЛЫҒАДЫ

Мемлекеттік маңызы бар қалалардың бірі – Шымкент. Миллионнан аса тұрғыны бар мегаполисте баспана мен бос жұмыс орындары — маңызды мәселенің бірі. Осы тұста 2026 жылға дейін қала аумағында бірнеше нысанның құрылысы жүргізілуде.

БИЫЛ БАСПАНАЛЫЛАР САНЫ АРТАДЫ

Шымкентте 2023 жылы 160 нысан бой көтермек. Құрылыс жобасында 98 тұрғын үй, 18 инженерлік инфрақұрылым нысандары, мәдениет және 7 білім беру нысандары, 3 төтенше жағдай кешені, 4 спорт кешені, 2 саябақ бар. Ағымдағы жылдың 6 айлық қорытындысына сәйкес 41,5 мың шаршы метр болатын 10 көпқабатты тұрғын үй,  3 білім, 2 спорт нысандарының құрылысы аяқталып, 70 нысанның жобалау-сметалық құжаттамалары әзірленген.

2023 жылы мегаполистің бірнеше тұрғыны жаңа қонысқа ие болмақ. Тұрғын үй-коммуналдық инфрақұрылымды дамытудың 2026 жылға дейінгі тұжырымдамасы аясында мемлекеттік бюджеттен 312,4 мың шаршы метрді құрайтын 4 090 пәтерлі 98 көпқабатты тұрғын үйдің құрылысын жүргізу жоспары бекітілген. Осы тұста биыл 67 тұрғын үйдің құрылысын аяқтап жыл соңына дейін ел игілігіне тапсыру көзделіп отыр. Жұмыс істейтін жастарға арналған 900 пәтер, халықтың әлеуметтік осал топтарына 505 пәтер де нарықтан сатып алынатын болады. Қала аумағындағы Тұран шағынауданында 18 үйдің, Бозарық шағынауданында 54 үйдің, Ақжайық шағынауданында 26 үйдің құрылысы жүргізілуде.

Одан бөлек,  соңғы жылдары тұрғын үй құрылысы саласында мегаполисте ауқымды жұмыстарды байқауға болады.  2020 жылы тұрғын үй құрылысын жүргізу бұдан екі есеге дейін төмен болатын.

КӨПФУНКЦИОНАЛДЫ ҚОЙМА КЕШЕНІ САЛЫНУДА

Мегаполисте ауылшаруашылығы өнімдерін сақтайтын қойма кешендері де көбейетін болады. Сауда-логистикалық орталығында  «НМИ — ЮГ» көп функционалды қойма кешені салынып жатыр. Қала әкімі Мұрат Әйтенов құрылысқа жауаптылармен бірге алаңда болып, жұмыстың барысын бақылады.

Бекітілген жобаға сәйкес,  ғимараттың аумағы 22 мың  шаршы метрге жуықтайды.  Тоңазытқыш камерасында тәулігіне 1455 тоннаға дейін өнімдерді сақтауға мүмкіндік бар. Ал ұн өнімдерін сақтайтын орында 327 тонна тауар сақтауға мүмкіндік бар. Жаңа кешен іске қосылғанда 100 ден астам адамды жұмыспен қамтуы күтілуде. Бүгінде өндірістік кестеге сәйкес құрылыс-монтаждау жұмыстары 30 пайызға аяқталған. Құрылыс жоспары бойынша көпфукционалды қойма кешені келесі жылы қолданысқа беріледі.

Қойма кешенінен бөлек Шымқалада азық-түлік, көкөніс және тағы басқа тұрмыстық тауар өнімдерін сақтауға арналған 240 мың тонна өнім қабылдауға қауқарлы кешен құрылысы жүргізіліп жатыр. Қазір мұнда құрылыс-монтаждау жұмыстары басталған, сондай-ақ ғимарат негізгі 3 блокқа бөлінеді: 12 мың шаршы метрді алып жатқан тауарды құрғақ сақтау бөлімі, екінші 8 мың шаршы метрлік мұздатқыш бөлігі, үшінші қосымша тауар сақтайтын бөлік.

ЖЫЛЫНА 262 МИЛЛИОН ЛИТР СУСЫН ШЫҒАРАТЫН ЗАУЫТ САЛЫНЫП ЖАТЫР

Қала келбеті алдағы уақытта бірнеше компания, зауыттармен толығады. Себебі «Жұлдыз» индустриалды аймағында «Coca-Cola İçecek» түрік компаниясының қолдауымен алкогольсіз, газдалған және газдалмаған ауыз су сусындарын шығаратын зауыт салынып жатыр. Зауыт жоспары былтыр «Coca-Cola İçecek» түрік компаниясы Қазақстан филиалының директоры Мұстафа Белтекин мен қала әкімі Мұрат Әйтеновпен талқылаған болатын.

Жүргізілген келіссөздерге сәйкес, биыл зауыттың іргетасы қаланып, қазір құрылыс-монтаж жұмыстарының 30%-ы кестеге сәйкес атқарылған. Аталған зауыттың құрылыс барысымен танысу мақсатында қала әкімі Мұрат Әйтенов нысан басында болды.

Құрылысты аяқтау 2024 жылға жоспарланып, 100-ден аса адамды жұмыспен қамту көзделуде.

БӨБЕКЖАЙЛАР ЖАҢА КЕЛБЕТКЕ ЕНЕДІ

Бала — мемлекеттің болашағы. Мегаполсите бүгінде 588 мектепке дейінгі мекеме жұмыс істеп тұр. Оның ішінде 517-і жекеменшік болса, 71-і мемлекеттік балабақшалар.

Соңғы жылдары ашылған мемлекеттік және жекеменшік балабақшалар жаңа ғимараттарға орналасқан. Дегенмен бірнеше жыл бойы қызмет көрсетіп жүрген ескі балабақшалар бұл күнде күрделі жөндеуді қажет етіп тұр. Соның бірі құрылғанына жарты ғасырдан асқан №3 бөбекжай-бақшасында күрделі жөндеу жұмыстары жүргізілуде.

Бөбекжай нысандарына аралап, ғимарат құрылысымен танысқан мегаполистің мэрі балалар қауіпсіздігін басты назарға алып, барлық жұмысты ережеге сай етіп атқаруды тапсырды.

163 баланы қабылдауға дайын балабақша мен №99 «Гүлдер» бөбекжайлары күзде өз жұмысын қайта бастауы жоспарланып отыр.