72 жұмысшы жалақысын ала алмай жүр

Шымкент қаласында жыл басынан бері  жұмыс уақыты кезінде 13 жазатайым оқиға тіркелген.  Бұл жағдайдан 15 қызметкер зардап шегіп, 4 адам қаза тапқан. Одан бөлек қалада 72 жұмысшы өз еңбек ақысын ала алмай жүр. Бұл туралы Еңбек инспекциясы басқармасының басшысы Бауыржан Қалжанов 6 айлық есеп беру брифингінде мәлімдеді. 2023 жылы Еңбек инспекциясы тарапына шымкенттіктерден 730 арыз-шағым келіп түскен екен. Оның 114-іне тексеріс жүргізіліп, 167 заң бұзушылық анықталды. Аталған заңбұзушылықтың басым бөлігі еңбек шартының жоқтығына қатысты. Сонымен қатар, қауіпсіздік ережелерін толық сақтамағандықтан жұмыскерлер арасында өндірістік жарақат алу жағдайлары да тіркелуде. Мәселен, биыл 13 осындай оқиға орын алып, 15 адам зардап шеккен.  Бұл дерек өткен жылдармен салыстырғанда төмендеген -, дейді басқарма басшысы Бауыржан Қалжанов.

Цифрлық технологияны кеңінен қолдануды көздеген басқарма енді жұмыс берушінің еңбек шарттарын қағазға ғана тіркеп қоймай, электронды түрде тіркеуді міндеттейді.  Enbek.kz сайтына енгізілмеген жағдайда заңбұзушылық болып саналады. Соңғы 6 айдың қорытындысымен 42 кәсіпорынның өз қызметкерлері алдында жалақы қарызы бары анықталды. Енді 72 жұмысшы өтелмеген 1 айлық жалақысын сот арқылы ғана өндіріп ала алады. Бұл бойынша қазіргі таңда жұмыстар жүргізілуде.

Айғақ-ақпарат