ЖОЛ КАРТАСЫН ОРЫНДАУҒА 1,2 ТРЛН ТЕҢГЕ БӨЛІНДІ

«Аманат» партиясының «Халықпен бірге» деп аталатын сайлауалды бағдарламасын орындауға бағытталған жол картасы бекітіліп, бүгін БАҚ өкілдеріне таныстырылды. Шымкент қаласы тұрғындарынан келіп түскен 10 мыңнан аса өтініш-арыздарды орындау мақсатында түзілген құжат 4 бағыттан, 100 тармақтан, оның ішінде 43 мың іс-шарадан тұрады. Бұл жұмыстар 2027 жылға дейінгі жоспар. Орындалуы үшін 1,2 трлн теңге қаржы қарастырылған. Оның ішінде биылғы жұмыстарға 159,8 млрд теңге бөлінген. Жалпы жол картасында халықтың өмір сапасын жақсарту, табысын арттырып, қолайлы орта қалыптастыру, денсаулық сақтау, білім, спорт, экология секілді әлеуметтік мәселелерді шешу қарастырылған. Қаланың даму жоспарымен сәйкестендіріліп жасалған жол картасының уақытылы жүзеге асуын «Аманат» партиясына мүше 22 депутат қадағалайтын болады.
АЙҒАҚ-АҚПАРАТ